نواز شریف کی رہائی۔۔۔عمران سرکار کے لیے نیا چیلنج

اسلام آباد ہائی کورٹ کے جسٹس اطہر من اللہ کی سربراہی میں دو رکنی بنچ نے نواز شریف، مریم نواز اور کیپٹن ریٹائرڈ صفدر کی ایون فیلڈ ریفرنس میں سزا کے خلاف اپیل کو قابل سماعت قرار دیا اور میاں نواز شریف ، مریم نواز اور کیپٹن صفدر کی سزائیں معطل  کر کے پانچ، پانچ لاکھ کے مچلکوں پر انھیں رہا کرنے کا حکم سنایا۔

ایک طرف اس فیصلہ نے ان لوگوں کو یہ احساس دلا دیا ہے جو مسلسل عدالتوں پر تنقید جاری رکھے ہوئے تھے کہ بہرصورت ریلیف عدالتوں سے ہی ملنا ہے اور پاکستان میں عدالتیں آزاد ہیں اور آئین اور قانون کے مطابق فیصلے کر رہی ہیں لہذا مسلم لیگ ن کو عدالتوں کے بارے میں اپنی پالیسی پر نظر ثانی کرنے کی ضرورت ہے۔ ورنہ لوگ یہ سمجھنے پر مجبور ہوجائیں گے کہ مسلم لیگ (ن) ’میٹھا میٹھا ہپ ۔۔کڑوا کڑوا تھو‘ کی پالیسی پر عمل پیرا ہے۔

مگر ہر دو صورتوں میں مسلم لیگ ن کو اس فیصلہ سے فائدہ ہوتا نظر آتا ہے کیونکہ مسلم لیگ ن کا یہ بیانیہ تقویت پکڑے گا کہ میاں نواز شریف، مریم نواز کے خلاف بنائے گئے کیسسز محض سیاسی تھے اور ان سب کا مقصد حالیہ الیکشن سے نواز شریف کو دور رکھنا تھا۔ انتخابی عمل کو ابھی دو ماہ بھی مکمل نہیں ہوے کہ ضمانت پر انھیں رہا کر دیا گیاہے اور مسلم لیگ ن کے حمایتیوں کے لیے اس پر یقین کرنا آسان نظر آتا ہے اور دوسری طرف مسلم لیگی حلقوں کے مطابق شہباز شریف کا دبنگ انداز اپنی جگہ لیکن وہ پارٹی کو میاں نواز شریف کی طرح قابو میں نہیں رکھ سکتے اور مسلم لیگی کارکنان کا بھی جو جذبہ میاں ںوازشریف کے لیے ہے وہ شہباز شریف کے لیے نہیں۔

میاں نواز شریف اور مریم نواز اگر دوبارہ پارٹی ورکر کو متحرک کرنے کے لیے رابطے شروع کرتے ہیں تو اس میں کوئی شک نہیں کے وہ اپنے اس مقصد میں کامیاب ہوں گے کیونکہ میاں نواز شریف جب خود باہر نکلتے ہیں تو مسلم لیگ کے کارکنان ان کے ساتھ نکلتے ہیں ایسی صورت میں موجودہ حکومت کو مشکلات کا سامنا کرنا پڑ سکتا ہے۔ میاں نواز شریف کی رہائی کے بعد موجودہ حکومت کو جو سب سے پہلے چیلنج کا سامنا کرنا پڑ سکتا ہے وہ ضمنی انتخابات ہیں جس میں یہ دیکھنا ہوگا کہ میاں نواز شریف اور مریم نواز انتخابی مہم میں حصہ لیتے ہیں یا نہیں۔۔۔۔ اگر حصہ لیتے ہیں تو کہاں تک اپنے ووٹرز کو متحرک کر پاتے ہیں، یہاں یہ بات بھی قابل ذکر ہے کہ نواز شریف کے حق میں آنے والے حالیہ فیصلے سے مسلم لیگ ن کا سپورٹر جو کہ مایوس ہو کر گھروں میں بیٹھ چکا تھا اس کا مورال بھی بلند ہو گیا ہے۔

موجودہ کیس کے دوران اگر نیب پراسیکیوٹر کے دلائل اور دوران سماعت ان کی کیس میں دلچسپی دیکھی جائے تو وہ مایوس کن تھی وہ اب تک اس بات پر تھے کے بار ثبوت شریف فیملی کے اوپر ہے مگر خود کوئی ثبوت پیش کرنے سے قاصر تھے، جسٹس اطہر من اللہ یہ استفسار کرتے رہے کہ کوئی ایک جملہ بتا دیں جس سے فلیٹس سے نوازشریف کا تعلق ثابت ہو۔ لیکن نیب پراسیکیوٹر اس کا جواب نہ دے سکے بلکہ بار بار تاخیری حربے استعمال پر عدالت نے برہمی کا اظہار بھی کیا۔ جس سے نیب کا ہوم ورک مکمل نہ ہونے اور اندورن خانہ کوئی ڈیل ہونے کی چہ میگوئیاں ہو رہی ہیں جو کہ ابھی محض قیاس آرائیوں ہیں۔

اس کے پیچھے سچ کیا ہے وہ آئندہ دنوں میں میاں نوازشریف کا رویہ ظاہر کرے گا، دیکھنا یہ بھی ہوگا کہ میاں نواز شریف اپنی گرفتاری سے پہلے والے بیانیہ پر قائم رہتے ہیں یا کوئی نیا بیانیہ سامنے آتا ہے ان سب باتوں کے لیے ہمیں ابھی انتظار کرنا ہوگا۔

یہ بھی دیکھنا ہوگا کہ عمران سرکار جو کہ ملک کے ابتر معاشی حالات کی وجہ سے غیر مقبول فیصلے بھی لینے پر مجبور ہے جیسے گیس کی قیمتوں میں اضافہ وغیرہ اب اس نئے چیلنج کا کیسے مقابلہ کرتی ہے کیونکہ میاں نوازشریف اور مریم نواز کی جیل سے باہر موجودگی میں عمران خان کو تگڑی اپوزیشن کا سامنا کرنا پڑسکتا ہے کیونکہ مسلم لیگ ن کا وہ سپورٹر جو کہ غیرفعال ہوکر گھر بیٹھ چکا تھا نوازشریف کی رہائی ان کے جذبے کو جلا بخشے گی۔ جبکہ دوسری طرف عمران خان کو ووٹ دینے والوں میں بڑی تعداد ایسے نوجوانوں کی ہے جو حکومت سے فوری اقدامات کی توقع کرتے ہیں جسیا کہ عمران خان نے ان کو یقین دلایا ہوا ہے اگر خان فوری طور پر ایسے اقدامات اٹھانے میں ناکام رہتے ہیں تو تب بھی وہ اپنے ووٹرز کو مطمئن نہیں کرسکیں گے اور یوں وہ نوجوان ووٹرز جو کہ تبدیلی کی امید لے کر خان کے قافلے میں شریک ہوئے تھے مایوسیوں کے سائے میں کھو جائیں گے اور اس نظام سے بیزار ہوجائیں گے۔ ان سارے حالات میں جہاں عمران سرکار کے لیے بہت سے چیلنجز تھے اس میں شریف خاندان کے رہائی کے بعد ایک بڑے چیلنج کا اضافہ ہوگیا ہے۔ لیکن وقت کے ساتھ ساتھ تمام پتے کھلتے چلے جائیں گے شاید اس کے لیے کچھ انتظار کرنا پڑے۔