کے الیکٹرک کیلئے بجلی مہنگی، یوریا کھاد پر96 کروڑ روپے سبسڈی کی منظوری

اسلام آباد: اقتصادی رابطہ کمیٹی نے کے الیکٹرک صارفین کیلئے بجلی ٹیرف ایک روپیہ 9 پیسے سے 2 روپے 89 پیسے تک مہنگا کرنے جب کہ یوریا کھاد ضروریات کیلئے ایل این جی کے استعمال پر 96 کروڑ روپے کی سبسڈی کی منظوری دے دی۔

مشیر خزانہ عبدالحفیظ شیخ کی زیر صدارت ہونے والے ای سی سی اجلاس کے بعد جاری اعلامیے کے مطابق احساس پروگرام کے تحت 37 لاکھ مستحقین کو 29 ارب 72 کروڑ روپے کی نقد امداد فراہم کرنے کی منظوری بھی دیدی گئی، مستحقین کو بارہ ہزار روپے فی کس امداد فراہم کی جائے گی ۔

یہ رقم رواں مالی سال احساس پروگرام کیلئے مختص 200 ارب روپے سے امداد فراہم کی جائے گی، تخفیف غربت ڈویژن نے 31 لاکھ نئے مستحقین کو امداد فراہم کرنے کی سفارش کی تھی ، ای سی سی کا سردیوں میں سوئی ناردرن گیس کمپنی کی طرف سے گھریلو صارفین کو 74 ارب روپے مالیت کی درامدی ایل این جی کی فراہمی پر غور کیا۔

سوئی ناردرن کی طرف سے بتایا گیا کہ 91 فیصد گھریلو صارفین 121 روپے ماہانہ بل ادا کرتے ہیں ، ای سی سی نے اوگرا کو معاملہ کو حل تلاش کرنے کی ہدایت کر دی ، اس معاملہ پر غور کے بعد پالیسی سازی کی جائے گی تاکہ گیس کے شعبے میں گردشی قرض کو روکا جا سکے۔

 ای سی سی نے موسم ربیع کی یوریا کھاد ضروریات کیلئے ایل این جی کے استعمال پر 96 کروڑ روپے کی سبسڈی کی منظوری بھی دے دی،رواں مالی سال دسمبر تا فروری یوریا کے دو لاکھ فاضل ذخائر کیلئے دو بند یوریا پلانٹس کو ایل این جی پر چلایا جائے گا۔

اعلامیے کے مطابق ایگریٹیک اور فاطمہ فرٹیلائزرز کو جولائی اور ستمبر میں یوریا بنانے کیلئے کم قیمت پر ایل این جی فراہم کی جائے گی ، ای سی سی نے نیشنل ٹیلیکمیونیکیشن کمپنی کے آیندہ مالی سال کے 4 ارب 59 کروڑ روپے کے بجٹ کی منظوری دے دی گئی۔