ادائیگیوں کے باوجود ملکی زرمبادلہ کے مجموعی ذخائر16 ارب ڈالر سے تجاوز

کراچی: پاکستان کے زرمبادلہ کے مجموعی ذخائر کی مالیت ادائیگیوں کے باوجود 16 ارب ڈالر سے تجاوز کرگئی۔

اسٹیٹ بینک آف پاکستان کی جانب سے جاری کردہ اعداد و شمار کے مطابق ملکی زرمبادلہ کے ذخائر میں مزید اضافہ ہوا ہے، گزشتہ ہفتہ ایک ارب ڈالر کے بین الاقوامی سکوک بانڈز کی ادائیگیاں کی گئیں تاہم ان ادائیگیوں کے باوجود زرمبادلہ کے سرکاری ذخائر مستحکم رہے۔

اسٹیٹ بینک کے مطابق 6 دسمبر کو ختم ہونے والے ہفتے کے دوران سرکاری ذخائر میں 12 کروڑ 10 لاکھ ڈالر کا اضافہ ہوا اور سرکاری ذخائر کی مالیت 9 ارب 23 کروڑ 36 لاکھ ڈالر کی سطح پر آ گئی، کمرشل بینکوں کے پاس 6 ارب 81 کروڑ 45 لاکھ ڈالر کے ذخائر موجود ہیں اور زرمبادلہ کے مجموعی ذخائر 16 ارب ڈالر سے تجاوز کر گئے۔

مرکزی بینک کی جانب سے بتایا گیا ہے کہ 9 دسمبر کو ایشیائی ترقیاتی بینک سے بھی ایک ارب 30 کروڑ ڈالر موصول ہوئے تاہم ایشیائی ترقیاتی بینک سے موصول ہونے والے فنڈز 19 دسمبر کو جاری ہونے والے اعدادوشمار میں ظاہر ہوں گے۔