پاکستان اور عالمی بینک کے درمیان406.6 ملین ڈالر قرض کا معاہدہ طے

اسلام آباد: پاکستان اور عالمی بینک کے درمیان خیبر پاس اکنامک کوریڈور منصوبے کے لئے قرض کا معاہدہ طے پاگیا ہے۔

پاکستان اور عالمی بینک کے درمیان خیبر پاس اکنامک کوریڈور(کے پی ای سی) منصوبے کے لیے 406.6 ملین ڈالر کے قرض کا معاہدہ طے پاگیا ہے، معاہدہ وفاقی وزیر برائے اقتصادی امور حماد اظہر کی نگرانی میں  طے پایا، پاکستان کی جانب سے سیکرٹری پرویز عباس اور عالمی بینک کے کنٹری ڈائریکٹر الانگو پاجا میتھو نے معاہدے پر دستخط کر دئیے ہیں۔

معاہدے کے تحت پشاور سے طورخم تک 48 کلومیٹر طویل 4 رویہ ، دوہری ہائی اسپیڈ موٹر وے تعمیر کی جائے گی اور اس منصوبے کی تکمیل پر صوبہ خیبر پختونخوا میں ایکسپریس وے سے ملحقہ علاقوں کی معاشی ترقی کو فروغ ملے گا۔

اس موقع پر وفاقی وزیر برائے اقتصادی امور حماد اظہر کا کہنا تھا کہ شمال جنوب اقتصادی راہداری تاریخی اہمیت رکھتی ہے، منصوبے میں پبلک پرائیویٹ پارٹنر شپ کی جائے گی، اور نجی سرمایہ کاری سے اقتصادی سرگرمیوں کے مواقع پیدا ہوں گے۔

کنٹری ڈائریکٹر ورلڈ بینک الانگو پاجامیتھو کا کہنا تھا کہ منصوبے کے ذریعے لاکھوں لوگوں کو روزگار ملے گا اور خیبرپختونخوا کی اقتصادی صورت حال بہتر ہوگی۔