پاکستان اسٹاک مارکیٹ میں شدید مندی، سرمایہ کاروں کے 100 ارب روپے غرق

اسلام آباد/ کراچی: پاکستان سٹاک مارکیٹ میں کاروباری ہفتے کے پہلے روز ہی بڑی مندی کے باعث سرمایہ کاروں کے 100 ارب روپے سے زائد ڈوب گئے۔

رواں ہفتے کے پہلے کاروباری روز پاکستان سٹاک مارکیٹ میں شدید مندی دیکھنے میں آئی، 100 انڈیکس میں 824.70 پوائنٹس گر گیا۔ تنزلی کے باعث انڈیکس کی 8 حدیں گراوٹ کا شکار ہوئیں جن میں 40800، 40700، 40600، 40500، 40400، 40300، 40200، 40100 شامل ہیں۔ گزشتہ ہفتے کے آخری کاروباری روز پاکستان سٹاک مارکیٹ کا 100 انڈیکس 177 پوائنٹس کی تیزی کے بعد 40832.99 پوائنٹس کی سطح پر بند ہوا تھا۔

پیر کو کاروبار کا آغاز ہی مندی سے ہوا، ابتدائی لمحات میں گراوٹ میں جانے والی سٹاک مارکیٹ مندی سے باہر نہ نکل سکی، ایک موقع پر حصص مارکیٹ کا 100 انڈیکس 40 ہزار کی نفسیاتی حد سے بھی محروم ہو گیا تھا جس کے باعث انڈیکس 39931.78 پوائنٹس کی سطح پر پہنچ گیا تھا۔

پاکستان سٹاک مارکیٹ میں کاروباری کے دوران 824.70 پوائنٹس کی تنزلی کے بعد 40008.29 پوائنٹس کی سطح پر پہنچ کر بند ہوا، پورے کاروباری روز کاروبار میں 2.06 پوائنٹس کی گراوٹ دیکھی گئی۔

آج بڑی مندی کے باعث پاکستان سٹاک مارکیٹ میں سرمایہ کاروں کو ایک کھرب (100ا رب) سے زائد کا نقصان اٹھانا پڑا جبکہ مارکیٹ میں 10 کروڑ 42 لاکھ 87 ہزار 930 شیئرز کا کاروبار ہوا، ان شیئرز کی مالیت 5 ارب69 کروڑ 13 لاکھ 80 ہزار 112 روپے بنتی ہے۔

معاشی ماہرین کا کہنا ہے کہ ملک کی غیریقینی سیاسی صورتحال کے باعث سٹاک مارکیٹ تنزلی کی طرف جا رہی ہے۔ دوسری جانب ایل او سی پرکشیدگی کی صورتحال، گیس کی قیمت میں ممکنہ 200 فیصد اضافے، ترکی کے پاکستان کے بارے میں تاثرات کے بعد سعودی عرب کی وضاحت کے باعث انویسٹرز دیکھو اور انتظار کرو کی پالیسی کے باعث سرمایہ کاری سے گریزاں ہیں۔

ماہرین کے مطابق کی دوسری بڑی وجوہات میں عالمی سطح پر پیش آنے والے واقعات ہیں، امریکی صدر ڈونلڈ ٹرمپ کی طرف سے روس کی گیس پائپ لائن پر پابندی سب سے اہم ڈویلپمنٹ میں سے ایک ہے۔