معیشت کیلئے اچھی خبر: اسٹیٹ بینک کو آئی ایم ایف سے 1 ارب 39 کروڑ ڈالر موصول

کراچی: کورونا کی عالمی وباء میں مشکلات کا شکار پاکستانی معیشت کو سہارا مل گیا، انٹرنیشنل مانیٹری فنڈ (آئی ایم ایف) نے پاکستان کی بیرونی ادائیگیوں کے توازن کی ضرورت پوری کرنے کیلئے ایک ارب 39 کروڑ ڈالر فراہم کر دیئے ہیں۔

اسٹیٹ بینک آف پاکستان کی جانب سے جاری اعلامیے کے مطابق بین الاقوامی مالیاتی ادارے (آئی ایم ایف) سے ایک ارب 39 کروڑ ڈالر پاکستان کے مرکزی بینک کو موصول ہوگئے ہیں، آئی ایم ایف سے یہ رقم ریپڈ فنانسنگ انسٹرومنٹ کے تحت ملی ہے۔

آئی ایم ایف کی جانب سے اعلامیے میں واضح کیا گیا ہے کہ کورونا کی وجہ سے مستقبل قریب میں غیریقینی صورتحال رہنے کا امکان ہے، ایسے میں پاکستان کی مالی و بیرونی ادائیگیوں کی ضروریات میں اضافہ ہوگا۔ آئی ایم ایف کی طرف سے یہ قرضہ گرتے ہوئے غیرملکی ذرمبادلہ کے ذخائر کو سنبھالنے میں معاون ہوگا۔

اعلامیے کے مطابق اس سے پاکستان کو بجٹ کیلیے درکار فنانسنگ میں بھی مدد ملے گی جب کہ اس امداد سے کورونا کی وجہ سے ہونیوالے اضافی اخراجات کو پورا کیا جاسکے گا۔آئی ایم ایف نے پاکستان کے لئے نئے قرضے کی منظوری کا اعلامیہ جاری کیا تھا، جس کے تحت آئی ایم ایف کے ایگزیکٹو بورڈ نے پاکستان کے لئے 1 ارب 39 کروڑ ڈالر قرض کی منظوری دی تھی۔

واضح رہے کہ قرضہ کورونا وائرس سے پیدا ہونیوالی صورتحال سے نمٹنے کیلیے منظور کیا گیا ہے۔ عالمی وباء کے باعث ہونیوالے معاشی نقصان کے باعث پاکستان کی ادائیگیوں کے توازن کی ضرورت پوری کرنے کیلیے یہ قرضہ فراہم کیا گیا تاہم پاکستان کے لیے یہ قرضہ کوٹے کا 50 فیصد ہے۔