رمضان المبارک سے قبل ملک بھر میں 14 اشیائے ضروریہ کی قیمتوں میں اضافہ

لاہور: رمضان المبارک سے قبل مہنگائی میں اضافہ ہو گیا۔ ایک ہفتے کے دوران 14 اشیائے ضروریہ کی قیمتیں بڑھ گئیں۔

وفاقی ادارہ شماریات کے مطابق ایک ہفتے میں مہنگائی میں 0.62 فیصد اضافہ ہوا، اس دوران آلو ساڑھے 12 روپے فی کلو گرام مہنگا ہوا، جب کہ پیاز کی قیمت میں ساڑھے 4 روپے اور مرغی 7 روپے فی کلو مہنگی ہوئی۔

ادارہ شماریات کے مطابق لہسن 7 روپے فی کلو اور کیلئے 4 روپے فی درجن مہنگے ہوئے، حالیہ ہفتے میں بکرے اور گائے کا گوشت مہنگا ہوا، ایک ہفتے میں دہی، تازہ دودھ اور چاول بھی مہنگے ہوئے۔ رواں ہفتے میں 12 اشیاء کی قیمتوں میں کمی ہوئی، ٹماٹر 2 روپے فی کلو اور انڈے 6 روپے فی درجن سستے ہوئے۔ ایک ہفتے میں دال چنا 5 روپے اور دال مسور 3 روپے فی کلو سستی ہوئی۔

ایک ہفتے کے دوران ایل پی جی کا گھریلو سلنڈر 11 روپے سستا ہوا، آٹے کا 20 کلو کا تھیلا 4 روپے سستا ہوا، حالیہ ہفتے میں چینی اور گھی کی قیمتوں میں بھی کمی ہوئی، حالیہ ہفتے میں 25 اشیاء کی قیمتوں میں استحکام رہا۔