پاکستان میں امن و امان کی بہتری کیلئے یورپی یونین 3.6 ارب روپے گرانٹ دے گا

اسلام آباد: امن و امان کی بہتری کیلئے یورپی یونین پاکستان کو 3.6 ارب روپے گرانٹ مہیا کرے گا، وزارت اقتصادی امور اور یورپی یونین پاکستان نے مشترکہ اعلامیہ جاری کردیا۔

وزارت اقتصادی امور اور یورپی یونین پاکستان کی جانب سے جاری مشترکہ اعلامیہ جاری کے مطابق یورپی یونین پاکستان کو 3.6 ارب روپے گرانٹ مہیا کرے گا۔گرانٹ امن و امان کی بہتری کے لیے بروئے کار لائی جائے گی، پروگرام کا دائرہ کار خیبر پختون خواہ، انضمام شدہ فاٹا کے علاقوں اور بلوچستان پر ہوگا۔

اعلامیے میں کہا گیا ہے کہ امن و امان کی بہتری کے اس پروگرام  کو اقوام متحدہ کے اداروں یونائٹیڈ نیشنز ڈویلپمنٹ پروگرام (یو این ڈی پی)، یونائٹیڈ نیشنز وومن (یو این وومن) اور یونائیٹڈ نیشنز آفس اور ڈرگ اینڈ کرائم (یو این او ڈی سی) کے زریعے سرانجام دیا جائے گا۔

یورپی یونین کے پاکستان میں سربراہ کا کہنا ہے کہ ہم پروگرام کی تیاری اور اس کی معاونت پر وزارت اقتصادی امور کا شکریہ ادا کرتے ہیں۔ جب کہ سیکرٹری اقتصادی امور نے کہا کہ پاکستان یورپی یونین کی جانب سے پاکستان میں جاری اقتصادی و سماجی پروگرام کا خیرمقدم کرتے ہیں۔