روسی کمپنی 10 ارب ڈالرکی سرمایہ کاری کرے گی،غلام سرور

کراچی: روس کی کمپنی پاکستان کے تیل و گیس کے شعبے میں 10 ارب ڈالر کی سرمای کاری کرے گی، وزیر پیٹرولیم کے مطابق معاہدے کے تحت روس پاکستان کو یومیہ 1 ارب کیوبک فٹ گیس بھی فراہم کرے گا۔

روسی وفد نے وفاقی وزیر پیٹرولیم غلام سرور خان سے اسلام آباد میں ملاقات کی جس میں پاکستان اور روس کے مابین تیل و گیس کی تلاش اور پیداوار سے متعلق بیشتر امور زیر بحث آئے۔

جس کے بعد روسی کمپنی اور انٹر اسٹیٹ گیس سسٹم پاکستان کے درمیان معاہدے طے پاگیا، روسی کمپنی  پاکستان میں  تیل و گیس کی تلاش و پیداوار کے شعبے میں 10 ارب ڈالر کی سرمایہ کاری اور گیس کی زیرزمین اسٹوریج سے متعلق سہولیات کی فراہمی میں بھی دلچسپی رکھتی ہے۔

وفاقی وزیر پٹرولیم غلام سرور خان کا کہنا تھا کہ  روس کی پاکستان میں تیل و گیس کے شعبے میں سرمایہ کاری میں دلچسپی خوش آئند ہے۔

معاہدے کے تحت روس پاکستان کو روزانہ 500 ملین سے 1 ارب کیوبک فٹ گیس فراہم کرے گا،جو سمندری راستے سے پاکستان پہنچائی جائے گی جبکہ پائپ لائن کی تعمیر آئندہ 3 سے 4 سال کے دوران مکمل کر لی جائے گی۔