درآمدی چینی مارکیٹ پاکستان پہنچ گئی، قیمتوں میں 10روپے فی کلو کمی کا امکان

چینی بحران پر قابو پانے کے لئے بیرون ملک سے درآمد کی جانے والی چینی مارکیٹ میں آگئی، جس کے بعد چینی کی قیمت میں 10 روپے فی کلو تک کمی کا امکان ہے۔

شوگر ڈیلرز کے مطابق نجے شعبے کے ذریعے اب تک 30 ہزار ٹن چینی پاکستان درآمد کی جا چکی ہے جب کہ ٹریڈنگ کارپوریشن آف پاکستان (ٹی سی پی) کے ذریعے مزید ایک لاکھ ٹن چینی رواں ماہ میں پاکستان پہنچ جائے گی۔

متحدہ عرب امارات سے 2 ارب روپے مالیت کی 25 ہزار ٹن چینی لے کر درآمدی چینی کا پہلا جہاز 12 اکتوبر تک کراچی پورٹ پر پہنچ جائیگا جبکہ دوسرا جہاز 76 ہزار ٹن چینی لے کر 21 اکتوبر تک پہنچے گا۔ اسی طرح اکتوبر میں ٹی سی پی کے ذریعے ایک لاکھ ٹن چینی درآمد کا عمل مکمل کر لیا جائے گا۔

ٹریڈنگ کارپوریشن آف پاکستان نے 50 ہزار ٹن مزید چینی درآمد کرنے کا ٹینڈر بھی دیا ہے، مجموعی طور پر تین لاکھ ٹن چینی بیرون ممالک سے منگوائی جائے گی، درآمدی چینی مارکیٹ میں آنے سے اس کی قیمت میں 10 روپے فی کلو تک کمی آنے کا امکان ہے۔