سندھ بھر میں انسداد ٹائیفائیڈ ویکسی نیشن مہم کا آغاز21 اکتوبر سے ہوگا

کراچی: سندھ میں پہلی بار بچوں کو ٹائیفائیڈ سے بچاؤ کی حفاظتی ویکسین مہم چلانے کا فیصلہ کیا گیا ہے، کراچی سمیت سندھ بھر میں 21 اکتوبر سے انسداد ٹائیفائیڈ ویکسی نیشن شروع کی جائے گی۔ نومبر کے اختتام تک ٹائیفائیڈ ویکسین کو بچوں کے قومی حفاطتی ٹیکہ جات پروگرام (ای پی آئی ) میں شامل کر لیا جائے گا۔

حکومت سندھ نے صوبے کے بچوں کو ٹائیفائیڈ سے محفوظ رکھنے کیلئے پہلی بار ٹائیفائیڈ کی حفاظتی ویکسین لگانے کا حتمی پروگرام مرتب کر لیا ہے، ٹائیفائیڈ حفاظتی ویکسین 9 ماہ سے 15سال عمر تک کے بچوں کو انجکشن کے ذریعے لگائی جائے گی جبکہ مہم کے دوران حیدرآباد سمیت سندھ کے 8 اربن اضلاع کے بچوں میں بھی حفاظتی ویکسین لگائی جائے گی۔

ای پی آئی پروگرام کے صوبائی مینجر ڈاکٹر ظہور بلوچ نے ٹریبیون ایکسپریس کو بتایا کہ ٹائیفائیڈ ویکسین مہم کے دوران 11لاکھ بچوں کو ٹائیفائیڈ کے جراثیم سے بچاؤکی حفاظتی ویکسین لگائی جائے گی، یہ مہم 3دن تک جاری رہے گی جبکہ بچوں کو ٹائیفائیڈکے جراثیم سے محفوظ رکھنے کیلیے اس ویکسین کو پہلی بار بچوںکے قومی پروگرام برائے حفاظتی ٹیکہ جات میں بھی روٹین ویکسین کے طور پر شامل کیا جا رہا ہے جس میں بچوںکی روٹین ایمونائزیشن کے دوران ٹائیفائیڈ ویکسین کی ایک ڈوز لگائی جائے گی۔

ای پی آئی میں شامل کی جانے والی ٹائیفائیڈ ویکسین کو اس لیے شامل کیا جا رہا ہے کہ پاکستان میں ٹائیفائیڈکے جراثیم پر دستیاب اینٹی بائیوٹک کے مطلوبہ نتائج حاصل نہیں ہو رہے جس پر ماہرین صحت اور عالمی اداروں کی سفارش کے بعد ٹائیفائیڈ ویکسین کو بچوںکی روٹین ایمونائزیشن میں شامل کرنے کا فیصلہ کیاگیا جو رواں سال نومبر تک شامل کر لی جائے گی۔