کرونا وائرس پھیلنے کےخدشے کے پیش نظر چین سے شہری نہیں نکال رہے، ظفرمرزا

اسلام آباد: وزیراعظم کے معاون خصوصی برائے صحت ڈاکٹر ظفر مرزا نے کہا ہے کہ کرونا وائرس پاکستان بھی پھیلنے کے خدشے کے پیش نظر اپنے شہریوں کو کو چین سے نہیں نکال رہے ہیں۔

اسلام آباد میں پریس کانفرنس کے دوران وزیراعظم کے معاون خصوصی برائے صحت ڈاکٹر ظفر مرزا نے بتایا کہ چین میں اب تک 7831 افراد میں کرونا وائرس کی تصدیق ہو چکی ہے جس کے باعث 170 اموات ہوئیں، 15 ممالک میں یہ بیماری پھیل چکی ہے، ان ممالک کے افراد ماضی قریب میں چین سفر کر چکے ہیں تاہم پاکستان میں اب تک کرونا وائرس سے کوئی شخص متاثر نہیں ہوا ہے۔

انہوں نے کہا کہ چین میں 4 پاکستانی اس وائرس سے متاثر ہیں، ہم عجلت میں ایسا کوئی قدم نہیں اٹھائیں گے جس سے بڑے پیمانے پر نقصان اٹھانا پڑے، چین سے پاکستانی شہریوں کو نہ نکالنے کا فیصلہ غیر ذمہ داری نہیں بلکہ ذمہ دارانہ ہے، اگر جلد بازی میں لوگوں کو نکالا تو وائرس دوسرے ممالک میں بھی پھیل جائے گا۔

معاون خصوصی کا مزید کہنا تھا کہ حکومت نے صورت حال پر نظر رکھی ہوئی ہے جب کہ چین میں پاکستانی متاثرہ طللبہ کی صحت بھی بہتر ہورہی ہے۔ انہوں نے کہا کہ جب چین سے شہری آئیں گے تو ان کی اسکیننگ کا بندوبست کیا ہوا ہے، جو چینی شہری آئیں گے وہ 14 روز نگہداشت میں رہیں گے۔