اسرائیلی سائنسدانوں کی جانب سے کورونا وائرس سے بچاؤ کی ویکسین تیار کرنے کا دعویٰ

یروشلم: امریکی و برطانوی سائنس دانوں کے بعد اب اسرائیلی محقیقین نے بھی کورونا وائرس سے بچاؤ کی ویکسین تیار کرنے کا دعویٰ کیا ہے۔

اسرائیلی سائنسدانوں کا کہنا ہے کہ وہ کورونا وائرس سے بچاؤ کی ویکسین تیار کرنے کے انتہائی قریب ہیں اور اگر معاملات ایسے ہی آگے بڑھتے رہے تو چند ہفتوں میں مطلوبہ ویکسین تیار کر لی جائے گی۔ اس سے قبل امریکی سائنسدانوں نے بھی کورونا وائرس سے بچاؤ کی پہلی ویکسین تیار کرنے کا دعویٰ کیا تھا اور کہا تھا کہ ممکنہ طور پر تیار کی گئی ویکسین کو رواں برس اپریل میں آزمائش کے لیے پیش کیا جائے گا۔

اسرائیلی وزیر سائنس وٹیکنالوجی اوفر اکنیس نے ‘دی گلیلی ریسرچ انسٹی ٹیوٹ’ کے سائنس دانوں کو مبارک باد دیتے ہوئے کہا کہ اگر معاملات یوں ہی آگے بڑھتے رہے تو آئندہ چند ہفتوں میں ویکسین تیاری کی صورت میں اگلے 3 ماہ میں اسے انسانوں کے لیے پیش کردیا جائے گا۔

اس حوالے سے تحقیقی ادارے کے بائیوٹیکنالوجی شعبے کے سربراہ نے بتایا کہ مذکورہ ویکسین دراصل انفیکشن اور وائرس والی بیماریوں سے بچاؤ کے لیے بنائی جا رہی ہے جس میں ایسے جذیات شامل کیے گئے ہیں جو خصوصی طور پر کورونا وائرس کا سبب بننے والے وائرس کووڈ 19 کو بڑھنے سے روکتے ہیں۔

امریکی کمپنی موڈرینا کی جانب سے دعویٰ کیا گیا تھا کہ اس نے کورونا وائرس سے بچاؤ کی ویکسین تیار کرلی ہے اور اس ویکسین کو امریکا کے نیشنل انسٹیٹوٹ آف الرجی اینڈ انفیکشیئس ڈیزیز (این آئی اے آئی ڈی) اور نیشنل انسٹیٹوٹ آف ہیلتھ (این آئی ایچ) کو بھجوا دیا گیا ہے۔ کمپنی کا کہنا تھا کہ مذکورہ دونوں ادارے ویکسین کا جائزہ لینے کے بعد اسے اپریل تک انسانوں پر آزمانے کا کام شروع کریں گے۔

واضح رہے کہ امریکی کمپنی سے قبل برطانوی سائنسدانوں نے بھی کورونا وائرس سے بچاؤ کے لئے ایک ویکسین تیار کرنے کا دعویٰ کیا تھا۔ گیارہ فروری کو امپرئیل کالج لندن کے ماہرین نے دعویٰ کیا تھا کہ انہوں نے کورونا وائرس سے بچاؤ کی ویکسین تیار کرلی ہے اور انہوں نے مذکورہ ویکسین کو جانوروں پر آزمانا بھی شروع کردیا ہے۔

امریکی و برطانوی سائنسدانوں کے بعد اب اسرائیلی سائنسدانوں نے بھی دعویٰ کیا ہے کہ انہوں نے بھی کورونا وائرس سے متعلق ویکسین تیار کرلی۔ اسرائیلی ویب سائٹ ‘یروشلم پوسٹ’ نے اپنی رپورٹ میں اسرائیلی وزیرسائنس اوفراکنیس کا حوالہ دیتے ہوئے بتایا کہ اسرائیلی ماہرین کورونا وائرس سے بچاؤ کی ویکسین تیار کرنے کے انتہائی قریب ہیں۔

انہوں نے دعویٰ کیا کہ تیاری کے آخری مراحل میں پہنچنے والی ویکسین کورونا سمیت دیگر وائرل بیماریوں پر بھی اثر انداز ہوگی۔ اسرائیلی سائنسدانوں کے تازہ دعوے سے قبل گزشتہ ماہ سوشل میڈیا پر ایسی خبریں وائرل ہوئی تھیں کہ اسرائیل نے کورونا وائرس کی ویکسین تیار کرکے چین بھجوا دی۔

سوشل میڈیا پر چلنے والی خبروں کو بنیاد بنا کر متعدد عالمی اداروں نے بھی ایسی رپورٹس دی تھیں کہ اسرائیل نے چین کی جانب ویکسین بھجوادی۔ تاہم بعد ازاں عالمی ادارہ صحت (ڈبلیو ایچ او)، اسرائیلی اور چینی حکام نے تصدیق کی تھی کہ مذکورہ خبریں جعلی ہیں۔ دوسری جانب عالمی ادارہ صحت نے امریکی و برطانوی سائسندانوں کی جانب سے ویکسین تیار کرنے والے دعووں کے باوجود واضح کیا تھا کہ فروری کے وسط تک دنیا میں کورونا وائرس سے تحفظ کی کوئی بھی ویکسین دستیاب نہیں۔