مصباح الحق قائداعظم ٹرافی کی تاریخ میں طویل العمرکپتان بن گئے

کراچی: قومی کرکٹ ٹیم کے سابق کپتان مصباح الحق قائداعظم ٹرافی کی تاریخ میں سب سے طویل العمرقیادت کرنے والے کپتان بن گئے۔

یو بی ایل اسپورٹس کمپلیکس کراچی میں ملک کے سب سے بڑے ڈومیسٹک ایونٹ قائد اعظم ٹرافی کرکٹ ٹورنامنٹ کا فائنل سوئی ناردرن گیس اورحبیب بینک کے درمیان کھیلا گیا۔

سوئی ناردرن کی ٹیم کی سربراہی مصباح الحق نے کی۔ اس طرح وہ قائد اعظم ٹرافی کی تاریخ میں سب سے طویل العمر قیادت کرنے والے کپتان بن گئے ہیں۔ مصباح الحق نے یہ اعزاز 44 برس 190 دن کی عمر میں فائنل میں اپنی ٹیم کی کپتانی کرتے ہوئے حاصل کیا۔

اس سے قبل ملک کے سب سے بڑے ڈومیسٹک ایونٹ میں معمر کپتان ہونے کا اعزاز محمد سعید کے پاس تھا، انہوں نے یہ اعزاز 1954 میں بہاولپور کے خلاف پنجاب کی قیادت کرتے ہوئے اپنے نام کیا تھا، اس وقت محمد سعید کی عمر 43 سال اور 147 دن تھی۔