انضمام الحق کی نئے چیف سلیکٹر سے تعاون کی درخواست

لاہور:  قومی کرکٹ ٹیم کے سابق چیف سلیکٹر انضمام الحق نے  نئے چیف سلیکٹر سے تعاون کرنے کی درخواست کر دی انہوں نے کھلاڑیوں پر تنقید کو بھی غلط قرار دیا۔

پی سی بی کیلیے بلاگ میں سابق چیف سلیکٹر نے لکھا ہے کہ ہمیں سمجھنا چاہیے یہ پاکستان کی ٹیم ہے، ان کھلاڑیوں کو مشکل وقت میں حوصلہ افزائی کی ضرورت ہوتی ہے، تنقید برائے اصلاح سے کوئی انکار نہیں کرتا مگرجس طرح کھلاڑیوں کو بھارت کیخلاف میچ ہارنے کے بعد نشانہ بنایا گیا اس کی مذمت کرتا ہوں۔

سابق چیف سلیکٹر نے کہا کہ تین سال سے زائد برس کام کے دوران مجھے پرستاروں کی بڑی تعداد نے سپورٹ کیا، اب میرا معاہدہ ختم ہورہا ہے۔ میری درخواست ہے کہ نئے چیف سلیکٹر پر تنقید کے بجائے انہیں سپورٹ کریں، ہمیں مشکلات میں اپنوں کا ساتھ دینے کا رواج اپنانا ہوگا۔

انضمام الحق نے ایک بار پھر پلیئنگ الیون کی سلیکشن میں مداخلت پر اپنی صفائی پیش کرتے ہوئے کہا کہ پاکستانی اسکواڈ منتخب کرنے کی ذمہ داری سلیکشن کمیٹی کی ہے مگر فائنل الیون میں بھی چیف سلیکٹر سے رائے لی جاتی ہے مگر وہ حتمی نہیں ہوتی، انتخاب کوچ اورکپتان کی ذمہ داری ہے، مجھے پی سی بی نے بطور چیف سلیکٹرورلڈکپ میں قومی کھلاڑیوں کی کارکردگی کا جائزہ لینے کیلیے انگلینڈ روانہ کیا تھا۔انہوں نے بھتیجے امام الحق کا بھی ایک بار پھر بھرپور دفاع کرتے ہوئے انھیں بہترین بیٹسمین قرار دیا۔