شاہین آفریدی ڈینگی مچھر کا شکار، فاسٹ باولر پری سیزن کیمپ سے باہر

لاہور: قومی کرکٹ ٹیم کے جاری پری سیزن کیمپ میں دو اہم کھلاڑی فٹنس مسائل  سے دوچار ہوگئے ہیں۔ فخر زمان کی انجری کے بعد شاہین آفریدی ڈینگی بخار میں مبتلا ہو گئے۔

فاسٹ باولر شاہین شاہ آفریدی کو تین روز سے بخار تھا، جس پر ان کا مقامی اسپتال میں چیک اپ کرایا گیا تو رپورٹ میں ڈینگی بخار کی نشاندہی ہوئی۔ شاہین آفریدی لاہور کے ایک اسپتال میں زیر علاج ہیں۔

ذرائع کےمطابق وہ تین ہفتے تک کرکٹ کی سرگرمیوں سے دور رہیں گے۔ شاہین آفریدی کےمتبادل کا ابھی اعلان نہیں کیا گیا، ستمبر کے پہلے ہفتے تک جاری رہنےو الے پری سیزن کیمپ میں اوپنر فخرزمان بھی گھٹنے کی انجری کا شکار ہوگئے ہیں۔انجری کے باعث فخر زمان نے تاحال کیمپ میں نیٹ پریکٹس کا آغاز نہیں کیا۔

کرکٹ بورڈ کے ترجمان کےمطابق گذشتہ روز فخر زمان کے دائیں گھٹنے کا ایم آر آئی اسکین کروایا گیا۔فخر زمان کی ایم آر آئی رپورٹ پی سی بی میڈیکل ایڈوائزری پینل کو موصول ہوگئی ہیں۔پینل کی سفارشات کی روشنی میں فخر زمان کی کیمپ میں آئندہ شرکت کا فیصلہ کیا جائے گا۔