اپنا بیٹنگ نمبر طے کر لیا، کوشش ہو گی کہ اپنے نمبر پر ہی کھیلوں، سرفراز احمد

 کراچی: قومی کرکٹ ٹیم کے کپتان سرفراز احمد نے کہا ہے کہ بیٹنگ آرڈر میں اپنا نمبر طے کرلیا ہے اب کوشش ہو گی کہ اپنے نمبر پر ہی کھیلوں اور اچھا کھیل پیش کروں۔

کراچی میں پریس کانفرنس کرتے ہوئے سرفراز احمد کا کہنا تھا کہ ہیڈکوچ مصباح الحق کے ساتھ اچھے تعلقات ہیں مل کر کام کریں گے پوری کوشش ہوگی کہ سری لنکا کیخلاف اچھا کھیل پیش کریں۔

سرفراز احمد نے کہا کہ ورلڈ کپ کے دوران پاکستان کرکٹ بورڈ کے ساتھ اچھے تعلقات رہے، پی سی بی اور کپتان میں رابطہ اچھا ہونا چاہیے، کپتانی کے دورانیے کا  فیصلہ پی سی بی کا ہے اور وہ جس کو بھی چاہے ٹیسٹ ٹیم کا کپتان بنائے۔

سرفراز احمد نے کہا کہ عابد علی اور خرم منظور نے اچھا کھیل پیش کیا، میں نے اپنا نمبر بھی سیٹ کیا ہے کوشش ہو گی کہ اپنے نمبر پر ہی کھیلوں۔