زلمی گلگت بلتستان گرلز فٹبال لیگ شروع، پہلے میچ میں ٹیم شمشال فاتح

گلگت: خوبصورت قدرتی مناظر سے مالا مال گلگت بلتستان کے بلند و بالا پہاڑوں کے دامن میں زلمی گلگت بلتستان گرلز فٹبال لیگ کا آغاز ہو گیا، ٹورنامنٹ  کے پہلے میچ میں ٹیم شمشال کے شاندار فاتحانہ آغاز سے ایونٹ میں نیا جوش آ گیا۔

افتتاحی تقریب کے ساتھ ہی گلگت بلتستان میں زلمی ٹی وی کے اشتراک سے گلگت بلتستان گرلز فٹبال لیگ کا آغاز ہوگیا۔ پہاڑوں کے دامن میں قائم خوبصورت پاسو گراونڈ میں لیگ کے پہلے روز دو میچز کھیلے گئے۔ پہلے میچ میں شمشال نے سوست کو پانچ صفر سے ہرادیا۔ فاتح ٹیم کی جانب سے شائستہ نے شاندار ہیٹ ٹرک بنائی جب کہ ثانیہ اور ارم نے ایک ایک گول کیا۔

دوسرے میچ میں چیپرسان نے ہوم ٹیم پاسو کو دو صفر سے شکست دے دی۔ چیپرسان ٹیم کی کھلاڑی ملیحہ اور نبیلہ نے ایک ایل گول کرکے ٹیم کی جیت میں اہم کردار ادا کیا۔ افتتاحی تقریب اور میچز کے موقع پر مقامی افراد کی بڑی تعداد موجود تھی جو بہترین کھیل۔سے لطف اندوز ہوئے۔

ویمن فٹبال ٹورنامنٹ 5 روز تک جاری رہے گا لیگ کے زیادہ تر میچز خوبصورت پاسو فٹبال گراونڈ  میں کھیلے جائیں گے جبکہ اس ایونٹ کا فائنل 17 ستمبر کو کھیلا جائے گا۔