اسلام آباد پولو چیمپئنز ٹرافی کے فائنل میں آسیان نے کالا باغ کو شکست دے دی

اسلام آباد: وفاقی دارالحکومت میں کھیلی جانے والی اسلام آباد پولو چیمئپنز ٹرافی اختتام پذیر ہوگئی، فائنل مقابلہ آسیان کی ٹیم نے اپنے نام کر لیا، شائقین کی بڑی تعداد نے کھیل کو دیکھنے کیلئے شرکت کی۔

پولو چیمئپنز ٹرافی کا فائنل مقابلہ آسیان اور کالا باغ کی ٹیموں کے درمیان کھیلا گیا۔ دونوں ٹیموں نے 7، 7 منٹ کے چار ہاف کھیلے۔ آخری اور سنسنی خیز مرحلے میں آسیان کی ٹیم نے 5 کے مقابلے میں 6 گول کرکے کالا باغ کی ٹیم کو شکست دے دی۔

پولیو چیمپئنز ٹرافی میں چار ٹیموں نے حصہ لیا۔ ہر ٹیم میں ایک انٹرنیشنل کھلاڑی کو شامل کیا گیا۔ انتظامیہ کا کہنا تھا کہ ٹرافی کے انعقاد سے مثبت پیغام دنیا کو دیا گیا ہے۔

ٹرافی میں حصہ لینے والے کھلاڑی بھی پرجوش دکھائی دیئے۔ ان کا کہنا تھا کہ یہ ایک مثبت سرگرمی ہے جسے مزید فروغ ملنا چاہیے اور پولو کے مزید گراؤنڈ بنانے کی ضرورت ہے۔

چیمپئنز ٹرافی کے فائنل مقابلے میں شائقین کی بھی بڑی تعداد نے شرکت کرکے اپنی من پسند ٹیم کی بھرپور حوصلہ افزائی کی۔ اختتامی تقریب میں مہمان خصوصی وفاقی وزیر حماد اظہر نے فاتح ٹیم کو ٹرافی دی اور کھلاڑیوں میں انعامات تقسیم کیے۔