آسٹریلیا کی ٹیسٹ میچ میں پاکستان کواننگز اور48 رنز سے شکست، سیریز میں وائٹ واش

ایڈیلیڈ: آسٹریلیا نے ہوم گراؤنڈ پر دوسرے ٹیسٹ میچ میں پاکستان کو اننگز اور 48 رنز سے شکست دے کر سیریز میں وائٹ واش کردیا۔

پاکستان اور آسٹریلیا کے درمیان 2 ٹیسٹ میچز کی سیریز کے دوسرے ٹیسٹ میں آسٹریلیا نے پاکستانی ٹیم کو اننگز اور 48 رنز سے بدترین شکست دے دی اور سیریز میں وائٹ واش کردیا۔ ایڈیلیڈ کے میدان میں کھیلے جانے والے دوسرے ٹیسٹ کے چوتھے روز جب اپنی دوسری نامکمل اننگز کے آغاز پر پاکستان کا مجموعی اسکور 3 وکٹوں کے نقصان پر 39 رنز تھا جب کہ کریز پر شان مسعود اور اسد شفیق موجود تھے۔

دونوں کھلاڑیوں نے انتہائی ذمہ داری کا مظاہرہ کیا اور 103 رنز کی شراکت قائم کی تاہم 123 کے مجموعی اسکور پر شان مسعود 68 رنز بناکر آؤٹ ہوگئے جب کہ اسد شفیق 57 رنز بناکر پویلین لوٹ گئے۔

اسد شفیق کے بعد افتخار احمد کا ساتھ دینے محمد رضوان میدان میں اترے، انہوں نے 45 رنز کی اننگز کھیلی تاہم وہ لیون کی گیند پر بولڈ ہوگئے، محمد رضوان کے بعد قومی ٹیم کا کوئی بھی کھلاڑی وکٹ پر کھڑا نہ رہ سکا اور پوری ٹیم 235 رنز بناکر آؤٹ ہوگئی۔

پاکستانی ٹیم کو عبرت ناک شکست دے کر آسٹریلیا نے دو ٹیسٹ میچز کی سیریز میں وائٹ واش کر دیا۔