پی سی بی نے بنگلہ دیش کا ٹیسٹ میچز پاکستان سے باہرمنتقل کرنے کا مطالبہ مسترد کردیا

لاہور: بنگلہ دیش کی جانب سے پاکستان میں ٹیسٹ میچ کھیلنے کے انکار پر پاکستان کرکٹ بورڈنے دوٹوک موقف اپناتے ہوئے کہا کہ ٹیسٹ میچز پاکستان کے علاوہ کسی اور مقام پر منتقل کرنا ناممکن ہے۔ پاکستان اپنے میچز ہوم گراؤنڈ پر ہی کھیلے گا۔

پاکستان نے آئندہ برس جنوری میں ٹی 20 اور ٹیسٹ سیریز میں پاکستان کی میزبانی کرنا ہے، بنگلہ دیشی ٹیم ٹی20 سیریز کے لیے تو دورہ پاکستان پر رضامند ہے لیکن ٹیسٹ میچ کے لیے بنگلہ دیش کرکٹ بورڈ ٹیم پاکستان بھیجنے پر رضامند نہیں۔

واضح رہے کہ بنگلہ دیش کرکٹ بورڈ کے چیف ایگزیکٹو نظام الدین چوہدری نے کہا ہے کہ وہ اپنے موقف پر ڈٹے ہوئے ہیں، ہم پاکستان میں صرف ٹی20 میچز کھیلنا چاہتے ہیں، بنگلہ دیش طویل دورہ پاکستان کے حوالے سے شکوک و شبہات کا شکار ہے۔

ان کا کہنا تھا کہ اس سیریز سے منسلک متعلقہ افراد اور ادارے پاکستان میں طویل دورانیے کے میچز نہیں کھیلنا چاہتے اور دراصل ہمارے پاس کوئی آپشن ہے ہی نہیں، ہم ٹی20 میچز کھیل سکتے ہیں لیکن ٹیسٹ میچز کھیلنے کی بات کی جائے تو وہ نیوٹرل مقام پر ہی منعقد ہوں گے۔

بنگلہ دیش کے اس بیان کے بعد پاکستان نے بھی دوٹوک موقف اپناتے ہوئے اپنے ہوم گراؤنڈ کے علاوہ کہیں اور میچ کھیلنے سے انکار کردیا ہے۔پی سی بی کے مطابق بنگلہ دیشی کرکٹ بورڈ نے پاکستان میں پہلے ٹی20 کھیلنے کی رضامندی ظاہر کی ہے لیکن خط میں پاکستان میں ٹیسٹ سیریز نہ کھیلنے کی وجہ نہیں بتائی۔

پاکستان نے حال ہی میں دو ٹیسٹ میچوں کے لیے سری لنکن ٹیم کی میزبانی کی جس کے ساتھ ہی ملک میں 10سال کے طویل عرصے کے بعد ٹیسٹ کرکٹ بحال ہوئی۔