باکسر محمد وسیم 2020ء کے دوران اوربھی زیادہ کامیابیاں حاصل کرنے کیلئے پرعزم

اسلام آباد: پاکستان کے مشہور باکسر محمد وسیم کا کہنا ہے کہ اس سے بہتر کوئی احساسات نہیں ہو سکتے کہ میں اپنے ملک کی نمائندگی کروں، قومی باکسر کہتے ہیں 2020ء کے دوران اور بھی زیادہ کامیابیاں حاصل کرنے کے لیے پر عزم ہوں۔

پاکستانی باکسر محمد وسیم نے اپنے ایک ویڈیو بیان میں کہا ہے کہ 2019 کے دوران دو فائٹس میں اچھی کارکردگی رہی۔ 2020ء کو بھی 2019ء کی طرح یادگار بنانا چاہتا ہوں، آئندہ سال کے لئے میری ٹیم نے اور بھی فائٹس پلان کی ہیں، پاکستان کے لیے اور زیادہ کامیابیاں حاصل کرنا چاہتا ہوں۔

واضح رہے کہ رواں سال 22 نومبر کو پاکستانی باکسر محمد وسیم نے میکسیکن باکسر گینگان لوپز کو پچھاڑ کر ورلڈ رینکنگ فائٹ جیتی تھی، سنسی خیز میچ کے دوران پاکستانی باکسر 8 راؤنڈز میں حریف باکسر پر حاوی رہے۔ انہوں نے سپر فلائی ویٹ کیٹیگری میں ٹائٹل اپنے نام کیا۔محمد وسیم کی یہ گیارہویں فائٹ تھی جس میں انہوں نے 10ویں بار کامیابی حاصل کی تھی۔

آٹھ راؤنڈز پر مشتمل میچ میں محمد وسیم کو 75 کے مقابلے میں 77 پوائنٹس سے فتح ملی۔ باکسر محمد وسیم کے حریف تین مرتبہ ڈبلیو بی سی لائٹ فلائی ویٹ کے عالمی چیمپئن رہ چکے ہیں۔ میچ کے دوران برطانوی نژاد پاکستانی باکسر محمد عامر نے بھی شرکت کی اور پاکستانی باکسر کا حوصلہ بڑھایا۔

اس سے قبل 14 ستمبر کو باکسر محمد وسیم نے دبئی میں منعقدہ پروفیشنل باؤٹ جیتی تھی، محمد وسیم نے فلپائنی باکسر کو پہلے ہی راؤنڈ میں ناک آؤٹ کردیا تھا۔ دبئی میں ہونے والی فائٹ سے قبل سکاٹ لینڈ میں انہوں نے جم کر پریکٹس کی اور اس کے بعد کہا تھا کہ سائیکل چلانے سے گھٹنے اور ٹانگیں مضبوط ہوتی ہیں۔