پاکستان ہاکی فیڈریشن نے رواں برس ملک میں ہاکی لیگ کروانے کا اعلان کر دیا

لاہور: قومی کھیل ہاکی کے شائقین کے لئے اچھی خبر آگئی، پاکستان ہاکی فیڈریشن نے رواں برس ہاکی لیگ کروانے کا اعلان کر دیا ہے۔

پاکستان ہائی فیڈریشن کے سیکرٹری آصف باجوہ کا کہنا ہے کہ ہاکی لیگ 2020 میں ہی ہو گی، قوم کو لیگ کی تفصیلات کے بارے میں میڈیا کے ذریعے جلد آگاہ کیا جائے گا۔

نیشنل ہاکی سٹیڈیم لاہور میں چیف سلیکٹر منظور جونیئر کے ہمراہ پریس کانفرنس کرتے ہوئے پاکستان ہائی فیڈریشن کے سیکرٹری آصف باجوہ نے کہا کہ نئے سال کا سورج پاکستان ہاکی کے لیے بہتر ہوگا، گزشتہ سال کے برعکس 2020 ہاکی کے لئے بہترین ہوگا، جونئیر چمپئن شپ کرانے کامقصد نوجوان کھلاڑیوں کو موقع دینا تھا، پہلے ادوار میں ایسے ٹورنامنٹ کو اگنور کیا۔

آصف باجوہ کا مزید کہنا تھا کہ جونئیر اشیا کپ کے لیے ٹریننگ کمپ کے لئے 54 لڑکوں کو مدعو کررہے ہیں ،دو ہفتوں پر مشتمل ٹریننگ کمپ لاہور میں منعقد ہوگا، دانش کلیم کمپ کی نگرانی کریں گے جب کہ محمد عمران،  مدثر علی خان رانا ظہیر بابر معاون کوچز کے فرائض انجام دیں گے۔

پاکستان ہائی فیڈریشن کے سیکرٹری نے مزید کہا کہ ہر دورہ پر ٹیم مینجر الگ الگ ہوں گے، آصف باجوہ نے کہا کہ تمام کوچز کوالیفائڈ ہے، جو کوچز دستیاب  ہیں ان میں دانش کلیم سے بہتر کوئی نہیں۔