پاکستان سپر لیگ جیت کی جنگ ہے جس کیلئے سب کچھ لگا دیں گے، وہاب ریاض

لاہور: فاسٹ بولر وہاب ریاض نے کہا ہے کہ پاکستان سپر لیگ (پی ایس ایل) جیت کی جنگ ہے اور اس جنگ میں اپنا سب کچھ لگا دیں گے۔

لاہور میں ایک تقریب میں شرکت کے بعد میڈیا سے بات چیت میں وہاب ریاض کا کہنا تھا پی ایس ایل کے دوران  کوشش ہوگی کہ ماضی کی عمدہ کارکردگی کو اس ایڈیشن میں بھی دہرائیں۔ پی ایس ایل پہلی دفعہ پاکستان میں ہونے جا رہا ہے،پوری دنیا کو یہ پیغام دینا بہت ضروری ہے کہ پاکستان پر امن اور محفوظ ملک ہے۔

انہوں نے کہا کہ حارث رؤف، محمد عامر اور میں نے بگ بیش لیگ میں 5 پانچ وکٹس حاصل کیں، یہ ظاہر کرتا ہے کہ پاکستانی پلیئرز میں کتنی صلاحیتیں ہیں، ہم تینوں میں مقابلہ ضرور ہے، گزشتہ 4 سال سے اوور آل ٹاپ وکٹ ٹیکر ہوں، کوشش ہے کہ اس دفعہ لیگ کا بہترین بولر بن کر نکلوں، ایک دفعہ موقع ملا تھا لیکن بدقسمتی سے نہ بن سکا۔

قومی پیسر نے کہا کہ ٹیم میں سلیکٹ نہ ہونے کا افسوس تو ضرور ہوتا ہے، میرا پختہ یقین ہے اور مجھے یہ لگتا بھی ہے کہ میری اسکلز سب سے بہتر ہیں، بولنگ کے ساتھ بیٹنگ ڈیپارٹمنٹ میں بھی عمدہ سے عمدہ پرفارم کرنے کی کوشش کر رہا ہوں۔

وہاب ریاض نے واضح کیا کہ میں نے ٹیسٹ کرکٹ سے ابھی ریٹائرمنٹ نہیں لی بلکہ آرام کے لئے کچھ وقت مانگا ہے تاہم جب تک مجھ میں جان ہے اور کھیلنے کا جذبہ موجود ہے، ملک کے لئے کھیلتا رہوں گا۔