آسٹریلیانے بھارت سے ٹیسٹ اور پاکستان سے ٹی ٹوئنٹی کی پہلی پوزیشن چھین لی

انٹرنیشنل کرکٹ کونسل (آئی سی سی) نے ٹیسٹ، ایک روزہ اور ٹی ٹوئنٹی کرکٹ کی سالانہ بنیاد پر نئی درجہ بندی جاری کردی، آسٹریلیا کرکٹ ٹیم نے بھارت سے ٹیسٹ اور پاکستان سے ٹی ٹوئنٹی کی پہلی پوزیشن چھین لی ہے۔

انٹرنیشنل کرکٹ کونسل کی جاری کردہ سالانہ رینکنگ کے مطابق ٹی ٹوئنٹی فارمیٹ میں پاکستان 3 درجے تنزلی کے بعد چوتھے درجے پر آگیا ہے۔ پاکستان کی جگہ آسٹریلیا کو پہلی پوزیشن مل گئی ہے، چھوٹے فارمیٹ کی رینکنگ میں انگلینڈ دوسرے اور بھارت تیسرے نمبر پر آ گیا۔

ون ڈے کی عالمی درجہ بندی میں ورلڈ چیمپیئن انگلینڈ کی ٹیم پہلی پوزیشن برقرار رکھنے میں کامیاب ہوئی ہے، بھارت دوسرے، نیوزی لینڈ تیسرے اور جنوبی افریقا چوتھے نمبر پر ہے۔ ون ڈن فارمیٹ میں آسٹریلیا کی پانچویں اور پاکستان کی چھٹی پوزیشن ہے۔

دوسری جانب ٹیسٹ رینکنگ میں پاکستان سات ویں نمبر پر موجود ہے، آسٹریلوی ٹیم ٹیسٹ میں پہلے نمبر پر آگئی ہے جب کہ نیوزی لینڈ دوسرے، بھارت تیسرے نمبر پر ہے۔ ٹیسٹ رینکنگ میں انگلینڈ کا چوتھا، سری لنکا کا پانچواں جب کہ جنوبی افریقا کا چھٹا نمبر ہے۔