جسپریت بمرا نے ورلڈ ریکاڑ بنا دیا، براڈ کا کیریئر خطرے میں پڑ گیا

برمنگھم میں بھارت اور انگلینڈ کے درمیان کھیلے جانے والے ٹیسٹ میچ میں ایک بولر نے دوسرے بولر کے خلاف ورلڈ ریکارڈ بنا دیا۔

رنز لینے والے بھارت کے ٹیسٹ کپتان جسپریت بمرا ہیں اور رنز دینے والے انگلینڈ کے سٹوراٹ براڈ ہیں۔

برمنگھم میں کھیلے جانے والے پانچویں ٹیسٹ میچ کے دوسرے دن جسپریت بمرا نے سٹوارٹ براڈ کے ایک اوور میں 35 رنز بنائے جو ٹیسٹ کرکٹ کی تاریخ کا سب سے مہنگا اوور بن گیا ہے۔

https://twitter.com/BCCI/status/1543188587423928320?t=s4S2PLW3y_zAxB0IvDtjdQ&s=19
اس اوور آغاز بمرا نے چوکے سے کیا۔ اس کے بعد براڈ نے وائڈ بال کرائی جو کیپر کی پہنچ سے دور تھی اس لیے باؤنڈری لائن کراس کر گئی اس طرح بیٹنگ ٹیم کو پانچ رنز ملے۔

اگلے گیند نو بال قرار دی گئی مگر اس پر بمراہ نے چھکا بھی لگایا یعنی کل سات رنز ملے۔ اس کے بعد بمرا نے اگلی تین گیندوں پر لگاتار تین چوکے لگائے مگر سلسلہ وہاں رکا نہیں۔

اوور کی آخری دو گیندوں پر ایک چھکا اور ایک رنز بنا۔ اس طرح براڈ کے اس اوور میں کل 35 رنز بنے جو ٹیسٹ کرکٹ کی تاریخ میں کسی ایک اوور میں پڑنے والے سب سے زیادہ رنز ہیں۔

اگر وائڈ بال پر چوکے اور نو بال کو نکال دیا جائے تو بمرا کے بلے سے بننے والے رنز 29 ہیں۔ اس طرح وہ ٹیسٹ کرکٹ میں ایک اوور میں سب سے زیادہ رنز بنانے والے بلے باز بن گئے ہیں۔

https://twitter.com/WisdenCricket/status/1543188107515904000?t=ludCd3GOah6hgKBcvx4loQ&s=19
گریٹ برائن لارا نے 2003 میں جوہانسبرگ میں پیٹرسن کے ایک اوور میں 28 رنز بنائے تھے۔ ان کے بعد آسٹریلیا کے جارج بیلی نے 2013 میں پرتھ میں اینڈرسن کے اوور میں بھی 28 ہی رنز جڑے تھے۔

صرف یہ دو بلے باز ہی نہیں بلکہ جنوبی افریقہ کے مہاراج نے پورٹ ایلزبتھ میں جو روٹ کے اوور میں بھی 28 رنز ہی بنائے تھے۔

آپ بھی یہی سوچ رہے ہوں گے کہ یہ سب تو ٹھیک ہے مگر یہ اچانک پانچواں ٹیسٹ کیسے شروع ہو گیا۔ تو بات ایسی ہے کہ بھارت اور انگلینڈ کے درمیان 2021 میں پانچ ٹیسٹ میچوں کی سیریز شروع تو ہوئی تھی مگر کرونا وبا کے باعث مکمل نہ ہو پائی تھی۔

اس سیریز کے چار ٹیسٹ میچ 2021 میں کھیلے جا چکے ہیں جن میں سے دو بھارت نے جیتے، ایک میں انگلینڈ کو کامیابی حاصل ہوئی جبکہ ایک ٹیسٹ میچ بغیر نتیجے کے ختم ہو گیا تھا۔

اسی سیریز کا پانچواں اور آخری ٹیسٹ میچ اب کھیلا جا رہا ہے۔