جمائمہ روڈریگز کی ناقابلِ شکست سنچری ؛بھارت نے آئی سی سی ویمنز ورلڈ کپ کے فائنل میں جگہ بنا لی

آئی سی سی ویمنز ورلڈ کپ 2025 کے دوسرے سیمی فائنل میں بھارت نے سنسنی خیز مقابلے کے بعد آسٹریلیا کو شکست دے کر فائنل کے لیے کوالیفائی کر لیا۔ ممبئی کے میدان میں جمائمہ روڈریگز کی شاندار سنچری نے بھارت کو تاریخی فتح دلائی۔

بھارت کی شاندار کامیابی

آئی سی سی ویمنز ورلڈ کپ کے دوسرے سیمی فائنل میں بھارت نے آسٹریلیا کی جانب سے دیا گیا 338 رنز کا بڑا ہدف 48.3 اوورز میں 5 وکٹوں کے نقصان پر حاصل کر لیا۔ بھارتی بلے باز جمائمہ روڈریگز نے 127 رنز کی ناقابلِ شکست اننگز کھیل کر ٹیم کو کامیابی کی راہ پر گامزن کیا۔

کپتان اور مڈل آرڈر کی عمدہ کارکردگی

بھارت کی کپتان ہرمن پریت کور نے 89 رنز کی ذمہ دارانہ اننگز کھیل کر جمائمہ کا بھرپور ساتھ دیا۔ دیگر کھلاڑیوں میں ریچا گھوش نے 26، شفالی ورما نے 10 جبکہ سمرتی مندھانا اور دپتی شرما نے 24، 24 رنز بنائے۔ بھارتی بلے بازوں نے بڑی کامیابی کے لیے متوازن اور پر اعتماد کھیل کا مظاہرہ کیا۔

آسٹریلیا کی اننگز

اس سے قبل آسٹریلیا نے ٹاس جیت کر پہلے بیٹنگ کا فیصلہ کیا اور مقررہ اوورز میں 338 رنز بنائے۔ آسٹریلیا کی جانب سے فوبی لیچ فیلڈ نے 119 رنز کی شاندار اننگز کھیلی، جب کہ ایلیس پیری نے 77 اور ایشلی گارڈنر نے 63 رنز بنائے۔ تاہم بھارتی بولرز نے آخری اوورز میں شاندار کم بیک کیا اور پوری ٹیم کو آؤٹ کر دیا۔

فائنل کی تیاری

بھارت اور جنوبی افریقا کے درمیان آئی سی سی ویمنز ورلڈ کپ کا فائنل 2 نومبر کو کھیلا جائے گا۔ گزشتہ روز جنوبی افریقا نے انگلینڈ کو 125 رنز سے شکست دے کر پہلی مرتبہ فائنل کے لیے کوالیفائی کیا تھا، جس کے بعد اب شائقین کرکٹ ایک دلچسپ اور تاریخی فائنل کے منتظر ہیں۔