مصباح الحق نے قومی کرکٹ ٹیم کے چیف سلیکٹر کا عہدہ چھوڑ دیا

قومی کرکٹ ٹیم کے چیف سلیکٹر اور ہیڈ کوچ مصباح الحق نے چیف سلیکٹر کے عہدے سے استعفیٰ دے دیا ہے جس کا باضابطہ اعلان انہوں نے پریس کانفرنس میں کیا۔
مصباح الحق نے کہاکہ زیادہ تر بیرون ملک ہونے کی وجہ سے دونوں ذمہ داریاں نبھانے سے قاصر ہوں ،اس لئے چیف سلیکٹر کا عہدہ چھوڑ دیا ہے۔زمبابوے کے خلاف ہوم سیریز اور دورہ نیوزی لینڈ کی ٹیمیں منتخب کروں گا اور 30 نومبر تک چیف سلیکٹر کی ذمہ داری نبھاتا رہوں گا، نیا چیف سلیکٹر جنوبی افریقہ کے خلاف سیریز سے ذمہ داریاں لے گا۔
مصباح الحق نے کہاکہ چیئرمین سے میٹنگ یا وزیر اعظم سے ملاقات استعفیٰ کی وجہ نہیں، مصروفیات کی وجہ سے عہدہ چھوڑا۔بورڈ کی مشاورت سے تنخواہ ملتی تھی ، اب جو کام کروں گا اسی کا معاوضہ ملے گا۔
مصباح الحق کاکہنا تھاکہ ہیڈ کوچ کے طور پر ہار اور جیت کا ذمہ دار ہوں گا، میری نظریں اگلے دو برس کی کمٹمنٹ پر ہیں، ہمارا سب سے بڑا ہدف تینوں فارمیٹس میں پاکستان کرکٹ ٹیم کو نمبر ون ٹیم بنانا ہے۔