دوسرا ٹیسٹ،ساجد خان کی اسپن کا جادو،بنگلہ دیش کی 6 وکٹیں اڑا دیں

ڈھاکا ٹیسٹ میچ میں چوتھے روز بنگلادیش نے پہلی اننگز میں 7 وکٹوں پر 76 رنز بنا لیے ۔ پاکستان کو اب بھی پہلی اننگز میں 224 رنز کی برتری حاصل ہے۔

چوتھے روز میچ تاخیر سے شروع ہوا اور پاکستان کی اننگز سے کھیل کا آغاز ہوا۔ اظہر علی 56 رنز اور کپتان بابراعظم 76 رنز بناکر آؤٹ ہوگئے جبکہ فواد عالم 50 رنز بناکر اور محمد رضوان 53 رنز بناکر ناٹ آؤٹ رہے۔ اس کے بعد پاکستان نے پہلی اننگز 300 رنز پر ڈیکلیئر کردی۔

بنگلادیش کی بیٹنگ اننگ کے آغاز میں ہی لڑکھڑا گئی اور صرف 76 رنز پر اس کے 7 کھلاڑی آؤٹ ہوچکے ہیں۔ شادمان اسلام نے 3 رنز، محمود الحسن (0)، نجم الحسن 30 ، مومن الحق (1)، مشفیق الرحیم (5)، مہدی حسن (0) اور لٹن داس نے صرف 6 رنز بنائے۔ پاکستانی آف اسپنر ساجد نے 6 کھلاڑیوں کو پویلین کی راہ دکھائی ۔

ڈھاکا ٹیسٹ میچ میں تیسرے دن کا کھیل مسلسل بارش کے باعث نہیں ہو سکا تھا۔پہلے ٹیسٹ میچ میں قومی ٹیم نے بنگلادیش کو 8 وکٹوں سے شکست دی تھی جب کہ ٹی ٹوئنٹی سیریز میں پاکستان بنگلادیش کو وائٹ واش کرچکا ہے۔