پی سی بی ٹیم بھارت بھیجنے پر رضا مند، احمد آباد میں میچ سیکیورٹی کلیئرنس سے مشروط

بھارتی کرکٹ بورڈ نے ون ڈے ورلڈ کپ 2023 کیلئے مجوزہ شیڈول انٹرنیشنل کرکٹ کونسل کو بھیج دیا ہے، جس کے مطابق پاکستان لیگ سٹیج کے 9 میچز 5 مقامات پر کھیلے گا۔ پاکستان روایتی حریف بھارت کیخلاف میچ 15 اکتوبر کو احمد آباد میں کھیلا گا۔

پاکستان کرکٹ بورڈ کے مطابق ایشیا کپ کا ہائبرڈ ماڈل قبول کرنے کی صورت میں پاکستان ٹیم کی ورلڈ کپ کھیلنے بھارت جائے گی لیکن احمد آباد میں میچ کھیلنے پر تاحال تحفظات موجود ہیں۔

دیجیٹیل میڈیا پلیٹ فارم سے گفتگو کرتے ہوئے پی سی بی حکام کا کہنا ہے کہ ایشیا کپ کیلئے پی سی بی کا تجویز کردہ ہائبرڈ ماڈل قبول ہونے کی صورت میں پاکستان ٹیم ورلڈکپ میں بھارت میں میچز کھیلنے کی یقین دہانی کروادی گئی ہے لیکن احمد آباد میں پاکستان اور انڈیا کے درمیان میچ پر تاحال سیکیورٹی تحفظات موجود ہیں۔

ذرائع کا کہنا ہے کہ ٹیم پاکستان احمد آباد میں میچ کھیلے گی یا نہیں یہ سیکیورٹی کلیرئینس سے مشروط ہے اور اس کا فیصلہ حکومت پاکستان کرے گی۔

اس سے قبل پاکستان کرکٹ بورڈ نے ایشیا کپ پاکستان سے منتقل ہونے کی صورت میں بھارت میں شیڈول ورلڈکپ میں شرکت نہ کرنے کی دھمکی دی تھی۔

ایشین کرکٹ کونسل کے اجلاس میں پی سی بی مینجمنٹ کمیٹی کے سربراہ نجم سیٹھی نے ہائبرڈ ماڈل تجویز کیا ہے جس کے مطابق ایشیا کپ کے ابتدائی چار سے پانچ میچز لاہور اور بقیہ میچز سری لنکا میں کروانے کی تجویز دی گئی ہے۔

پی سی بی کی جانب سے تجویز کردہ ہائبرڈ ماڈل کی بھی بھارتی کرکٹ بورڈ نے شدید مخالفت کی تاہم انٹرنشینل کرکٹ بورڈ کے وفد نے دورہ پاکستان کے دوران پی سی بی نے اپنے تحفظات سے آگاہ کیا تھا۔

ورلڈکپ کا مجوزہ شیڈول

کرکٹ ویب سائٹ کرک انفو کے مطابق پاکستان کی ٹیم ابتدائی دو میچز کولیفائنگ ٹیم کے خلاف حیدر آباد میں 6 اور 12 اکتوبر کو کھیلی گی جبکہ روایتی حریف 15 اکتوبر کو احمد آباد میں آمنے سامنے آئیں گے۔ اس کے بعد ٹیم پاکستان 20 اکتوبر کو بینگلور میں آسٹریلیا سے ٹکرائے گی اور افغانستان کے خلاف 23 اکتوبر کو چنائے میں میدان سجے گا۔

مجوزہ شیڈول کے مطابق پاکستان اور بنگلہ دیش کے درمیان میچ 31 اکتوبر کو کولکتہ میں کھیلا جائے گا جس کے بعد ٹیم پاکستان دوبارہ بینگلور روانہ ہوگی جہاں نیوزی لینڈ کے خلاف 5 نومبر کو میچ کھیلا جائے گا۔ پاکستان لیگ سٹیج کا آخری میچ کھیلنے دوبارہ کولکتہ جائےگی جہاں انگلینڈ کے خلاف ایڈن گارڈن میں 12 نومبر کو میچ شیڈول ہے۔