لاہورقلندرز نے پشاور زلمی کو شکست دے دی

کراچی میں کھیلے گئے پاکستان سپر لیگ فائیو کے اہم میچ میں پشاور زلمی نے ٹاس جیت کر پہلے بیٹنگ کرتے ہوئے 170 رنز اسکور کیے جواب میں لاہور قلندرز نے پانچ وکٹوں کے نقصان پر 171 رنز بناکر فتح حاصل کرلی۔اوپننگ فخر زمان اور تمیم اقبال نے کی۔

لاہور قلندرز کی پہلی وکٹ 18 رنز پر گری جس میں فخر زمان 6 رنز بناکر آؤٹ ہوگئے۔ تمیم اقبال نے 18 اور سہیل اختر نے 7 رنز، بین ڈنک نے 20 رنز، سمیت پاٹل نے بھی 20 رنز بنائے۔حفیظ نے دھواں دھار اننگ کھیلتے ہوئے 46 گیندوں پر ناقابل شکست 74 رنز بنائے جن میں 9 چوکے اور دو چھکے شامل ہیں۔ ڈی ویزے بھی ناقابل شکست رہے جنہوں نے دو چھکے لگائے اور 16 رنز اسکور کیے۔ثاقب محمود نے تین جب کہ راحت علی اور عمران محمد عمران نے ایک ایک وکٹ حاصل کی۔

پشاورزلمی نے ٹاس جیت کر بیٹنگ کا فیصلہ کیا۔ پشاور زلمی کی پہلی وکٹ ایک رن پر گری جس میں حیدر علی پہلی گیند پر بولڈ ہوگئے۔ زلمی کی جانب سے سب سے زیادہ رنز شعیب ملک نے 39 اسکور کیے، امام الحق 24، صہیب مقصود 16، ویلجوائن 37 اور ڈوپلیسز 31 رنز بناسکے۔لاہور قلندر کی جانب سے دلبر حسین نے تین وکٹ حاصل کیں جب کہ شاہین شاہ آفریدی، حارث رؤف اور ڈیوڈ ویزے نے دو دو وکٹیں حاصل کیں۔