پی ایس ایل:لاہور قلندرز ملتان سلطانز کو شکست دے کر پہلی بار فائنل میں پہنچ گئی

نیشنل اسٹیڈیم کراچی میں کھیلے گئے میچ میں ملتان سلطانز نے لاہورقلندرز کے خلاف ٹاس جیت کر فیلڈنگ کا فیصلہ کیا اور حریف ٹیم کو بیٹنگ کی دعوت دی۔ لاہور قلندرز کی جانب سے فخرزمان اور تمیم اقبال نے اننگز کا آغاز کیا تاہم قلندرز کی پہلی وکٹ 46 رنز پر گری جس میں تمیم اقبال 30 رنز بناکر آؤٹ ہوگئے جس کے بعد سہیل اختر آئے اور محض 5 رنز بنانے کے بعد رائیلی روسو کے ہاتھوں کیچ آؤٹ ہوئے۔

سہیل اختر کے بعد محمد حفیظ میدان میں آئے، انہوں نے اور فخر زمان نے محتاط انداز میں اننگز کو آگے بڑھایا تاہم وہ بڑی شراکت داری قائم نہ کر سکے اور 94 کے مجموعے پر محمد حفیظ 19 رنز بناکر پویلین لوٹ گئے جس کے بعد فخر زمان بھی 46 رنز پر لیتھ کی بال پر سہیل تنویر کو کیچ دے بیٹھے۔لاہور قلندرز کے بین ڈنک محض 3 رنز بنا کر چلتے بنے جس کے بعد سمت پیٹل نے 26 رنز بنائے اور ڈیوڈ ویزے 48 رنز کے ساتھ ناٹ آؤٹ رہے۔

قلندرز نے تمام اوورز کھیلتے ہوئے 182 رنز اسکور کیے اور مخالف ٹیم کو فتح کے لیے 183 رنز کا ہدف دیا۔ ملتان سلطانز کی جانب سے شاہد آفریدی نے 2 جب کہ لیتھ، سہیل تنویر، محمد الیاس اور  جنید خان نے ایک ایک کھلاڑی کو آؤٹ کیا۔

لاہور قلندرز کی جانب سے دیئے گئے ہدف کے تعاقب میں ملطان سلطانز کی جانب ست ذیشان اشرف 12 جب کہ ایڈم لیتھ نصف سینچری مکمل کرکے فخر زمان کے ہاتھوں کیچ آؤٹ ہوئے، کپتان شان مسعود نے ریلی روسو کے ساتھ اسکور کو 102 رنز تک پہنچایا اور 27 رنز بنا کر آؤٹ ہوئے۔حارث روؤف نے رلی روسو کی اننگز 18 رنز پر ختم کردی اور شاہد آفریدی کو صفر پر آؤٹ کردیا، جس کے بعد ڈیوڈ ویزے نےملتان سلطانز کی پوری ٹیم آخری اوور میں 157 رنز پر آؤٹ ہوگئی۔