متنازعہ جملوں پر غلطی تسلیم کی، اپنوں نےمروایا، سرفراز احمد

کراچی: قومی کرکٹ ٹیم کے کپتان سرفراز احمد کا کہنا ہے کہ متنازعہ جملے کے معاملے پر انہیں اپنوں نے مروایا ہے۔ ماضی کی تلخیاں بھلا دی ہیں دوسرے بھی انہیں معاف کردیں۔

کراچی میں میڈٰیا سے بات کرتے ہوئے سرفراز احمد کا کہنا تھا کہ ویسٹ انڈیز ویمن ٹیم کا پاکستان آنا خوش آئند ہے، امید ہے کہ دیگر ٹیمیں بھی پاکستان آ کر کھیلیں گی۔

قومی ٹیم کے کپتان کا کہنا تھا کہ وکٹ کے پیچھے بولتے رہنا ان کی عادت ہے اور فطرت تبدیل نہیں ہوگی لیکن ان کی غلطی کو ایشو بنانے کی کوشش کی گئی۔ اس معاملے میں اپنوں نے ہی مروایا غلطی کو تسلیم کیا جس کے بعد جنوبی افریقن کرکٹرمطمئن ہوگیا تھا، اسے واضح کیا کہ ماں کی اہمیت ہوتی ہے، کسی کی بے جا تنقید پرغصہ نہیں ہوں۔ سرفراز احمد نے کہا کہ انہوں نے تلخیاں بھلا دیں دوسرے بھی معاف کردیں۔

انہوں نے کہا کہ قومی ٹیم کی قیادت کے لیے پرامید ہیں ، مستقبل کے ایونٹس کے لیے بھرپور تیاری کریں گے، کھلاڑیوں کا مورال بلند ہے،عالمی کپ کے لیے مضبوط اسکواڈ تشکیل دیں گے۔ ایک سوال کے جواب میں انہوں نے کہا کہ محمد عامر خراب کارکردگی پر ٹیم سے باہر ہوا تھا لیکن اب اچھا کھیل رہا ہے۔

قومی ٹیم کے کپتان نے کہا کہ ان کی گراؤنڈ میں کارکردگی سب کے سامنے ہے، مزید بہتر کرنے کی کوشش کریں گے  اور کم بیک ہوگا انہوں نے پاکستانی عوام کا شکریہ ادا کرتے ہوئے کہا کہ قوم نے ہمیشہ کی طرح اس مرتبہ بھی ان کی حمایت کی اور کہا کہ تمام تر معاملے میں تعاون اور مدد پر پی سی بی کے بھی مشکور ہیں۔