کینیڈین وزیراعظم کے ہم شکل ‘افغان ٹروڈو’ کی سوشل میڈیا پردھوم

کابل: نامور شخصیات کے ہم شکل افراد ہمیشہ عوامی توجہ کا مرکز بنتے ہیں۔‘افغان ٹروڈو’کی مقبولیت نے سب کو دنگ کردیا ہے۔

افغان خبر رساں ایجنسی کے مطابق سلام مفتون نامی نوجوان نے ایک ٹی وی شو ‘افغان اسٹار’ میں گلوکاری کے جوہردکھانے کے لیے شرکت کی جنہیں دیکھ کر سب کا منہ کھلا رہ گیا، سلام مفتون کی تصاویر سوشل میڈیا پر وائرل ہیں جن پر متعدد صارفین نے انہیں ’افغان ٹروڈو‘ قرار دے دیا ہے۔

سلام مفتون کی شکل ہو بہو کینیڈا کے وزیراعظم جسٹن ٹروڈو سے ملتی ہے جنہیں دیکھ کر پہلی نظر میں کوئی بھی شخص دھوکا کھا جاتا ہے کہ یہ کینیڈا کے وزیراعظم ہیں۔

حالانکہ ایک ٹی وی شو میں مفتون نے ازراہ مذاق کہا کہ یہ ان کے بڑے بھائی ہیں جو بچپن میں بچھڑ گئے تھے جب کہ ان کے دوست انہیں ’سلام ٹروڈو‘ بھی کہتے ہیں۔