پاکستان اقوام متحدہ میں بھارت کا مکروہ چہرہ بے نقاب کرے، مشعال

اسلام آباد۔ حریت رہنما یاسین ملک کی اہلیہ مشعال ملک کا کہنا ہے کہ بھارت نے مقبوضہ کشمیر میں ظلم و ستم کا نہ رکنے والا سلسلہ شروع کر رکھا ہے، حکومت پاکستان اقوام متحدہ میں بھارت کا مکروہ چہرہ بے نقاب کرے۔ انسانی حقوق کمیشن کی کشمیر کی صورتحال پر شائع کردہ رپورٹ بھارتی مظالم سےپردہ اٹھانے کے لئے کافی ہے۔

مشعال ملک کی جانب سے جاری ایک بیان میں کہا گیا ہے کہ بات سے مکرجانا بھارت کا وطیرہ ہے، بھارت نے حریت قیادت کو بھی مذاکرت کی دعوت دی، حریت قیادت نے مذاکرات کشمیرمیں امن ہونے سے مشروط کر رکھے ہیں۔

انہوں نے کہا کہ بھارت نے مقبوضہ وادی میں بنیادی انسانی حقوق کی سنگین خلاف ورزیوں، نہتے عوام پر بہیمانہ تشدد کا سلسلہ جاری کر رکھا ہے، مقبوضہ کشمیر عوام کو مذہبی آزادی تک حاصل نہیں ہے۔ عاشورہ کے دوران حریت قیادت کو نظر بند جبکہ بے گناہ کشمیریوں کو شہید کرنے کا سلسلہ جاری رکھا گیا

مشعال ملک نے کہا ہے کہ حکومت پاکستان کو اقوام متحدہ میں مطالبہ کرنا چاہیے کہ کشمیر میں جاری ظلم وستم کی تحقیقات کے لیے بین الاقوامی ٹیم تشکیل دی جائے۔