’’بھارتی فوج کی جانب سے کشمیری بچوں کی قید،شہادتیں عالمی ضمیر پر سوالیہ نشان ہیں‘‘

اسلام آباد: وفاقی وزیر برائے اطلاعات و نشریاتی سینیٹر شبلی فراز نے کہا ہے کہ جارحیت کا شکار بچوں کے عالمی دن کے موقع پر دنیا کشمیری بچوں پر جاری بدترین ظلم وستم کا نوٹس لے۔

سماجی رابطوں کی ویب سائٹ ٹویٹر پر جاری اپنے ایک پیغام میں سینیٹر شبلی فراز نے کہا ہے کہ انسانیت کیخلاف بھارتی جرائم میں بچوں کی قید اور حراست کے دوران ان کی شہادتیں عالمی ضمیر پر سوالیہ نشان ہیں۔ پیلٹ گنز کے بے رحم استعمال نے بچوں کی بصارت چھین لی ہے۔

وفاقی وزیراطلاعات نے بات جاری رکھتے ہوئے بیان میں مزید کہا کہ جنت نظیر وادی کشمیر میں میں غیر انسانی اور تاریخ کا طویل ترین لاک ڈاؤن جاری ہے، جہاں بچے بھی قید و بند کی صعوبتیں برداشت کرنے پر مجبور ہیں۔

سینیٹر شبلی فراز نے مزید لکھا ہے کہ مقبوضہ جموں و کشمیرمیں غیر انسانی پابندیوں کے باعث خوراک، ادویات اور بچوں کیلئے دودھ تک نہیں پہنچ پا رہا، قابض بھارتی افواج کے جرائم پر انہیں کٹہرے میں کھڑا کیا جائے۔