کشمیریوں نے بھارت کیساتھ 70 سال کے حساب چکانے ہیں، فاروق حیدر

اسلام آباد: وزیراعظم آزاد کشمیر راجا فاروق حیدر کا کہنا ہے کہ آئین سے آرٹیکل 370 ختم کرنے سے بھارت نے مقبوضہ کشمیر کو اپنا اٹوٹ انگ کہنے کا نام نہاد دعویٰ کی نفی کردی ہے۔  کشمیریوں نے بھارت کے ساتھ 70 سال کے حساب کتاب چکانے ہیں۔

اسلام آباد میں پریس کانفرنس کے دوران وزیراعظم آزاد کشمیر راجا فاروق حیدر کا کہنا تھا کہ بھارت کشمیریوں کے حقوق سلب کر رہا ہے، بھارت نے کنٹرول لائن پرکلسٹر بموں کا استعمال کیا، جس سے چھوٹے بچے متاثر ہوئے تاہم حکومت نے کل پارلیمنٹ کا مشترکہ اجلاس طلب کیا ہے۔ ان کا کہنا تھا کہ ہمیں پاک فوج پرمکمل اعتماد ہے، بھارت کے ساتھ 70 سال کے حساب کتاب چکانے ہیں جب کہ آزاد کشمیر کا بچہ بچہ افواج پاکستان کے ساتھ ہے۔

وزیراعظم آزاد کشمیر نے کہا کہ ہم بھارتی آئین کو ہی تسلیم نہیں کرتے جب کہ آرٹیکل 370 ختم کرنے سے مقبوضہ کشمیر بھارت کا اٹوٹ انگ نہیں رہا۔ انہوں نے کہا کہ ہمارا احتجاج ریاست کی تقسیم پرہے،35 اے ریاست کے مہاراجہ نے اپنے لوگوں کے تحفظ کے لیے بنایا تھا۔

وزیراعظم آزاد کشمیر راجہ فاروق حیدر کا کہنا تھا کہ ہندوستان آزاد کشمیر میں موجود ڈیموں کو نشانہ بنانا چاہتا ہے، ہندوستان کشمیرمیں ظلم کو دبانے کے لئے ایل او سی پر فائرنگ کرتا ہے، ہندوستان ایل او سی پر فائرنگ کرکے پاکستان کے خلاف پراپیگنڈہ کرتا ہے، ہندوستان کشمیر کی خالص تحریک کو بیرونی تحریک قرار دینے کی کوشش کررہا ہے۔