بھارتی فوج نے کشمیریوں پرعرصہ حیات تنگ کردیا،500 سے زائد گرفتار

سری نگر:  قابض بھارتی فوج نے کشمیریوں کی آواز دبانے کے لیے مقبوضہ کشمیر میں اب تک حریت رہنماؤں سمیت 500 سے زائد افراد کو گرفتار کرلیا۔

مودی سرکار کی جانب سے  مقبوضہ کشمیر کی خصوصی حیثیت ختم کیے جانے کے بعد مقبوضہ وادی میں غاصب بھارتی فوج نے کشمیریوں پر عرصہ حیات تنگ کر دیا ہے، مسلسل چوتھے روز بھی کرفیو کی وجہ سے غذائی  قلت کا خدشہ پیدا ہوگیا ہے۔

مقبوضہ کشمیر عملاً فوجی چھاؤنی میں تبدیل ہوچکا ہے،  مقوضہ وادی کی آئینی حیثیت تبدیل کرنے پر کشمیریوں کےاحتجاج کو کچلنے اور شدید ردعمل کے خوف سے  قابض فوج نے 500 سے زائد سیاسی رہنماؤں و کارکنوں کو گرفتار کرلیا ہے، سری نگر، بارہ مولا اور دیگر علاقوں میں پولیس اسٹیشنز اور جیل سیاسی کارکنوں سے بھر گئے ہیں۔

جب کہ انٹرنیٹ اور موبائل سروس بند ہے، وادی بھر میں نظام زندگی مفلوج  ہے اور کشمیریوں کے احتجاج کو زبردستی روکنے کے لیے پوری ریاستی مشینری کو استعمال کیا جارہا ہے۔

ادھر سری نگر کے علاقے سورا میں لوگ کرفیو توڑتے ہوئے گھروں سے باہر نکل آئے اور احتجاج شروع کردیا، قابض فوج نے مظاہرین پر ریاستی طاقت کا بے دریغ استعمال کرتے ہوئے براہ راست گولیاں برسائیں اور آنسو گیس کی شیلنگ کی، جس کے نتیجے میں متعدد افراد کے زخمی ہونے کی بھی اطلاع ہے۔