عمران خان کے کینیڈین،برطانوی وزرائےاعظم سے رابطے، مسئلہ کشمیرحل کروانے پر زور

اسلام آباد: وزیراعظم عمران خان نے کینیڈا اور برطانیہ کے وزرائے اعظم سے رابطے کرکے انہیں مسئلہ کشمیر حل کروانے کے لیے اقدامات پر زور دیا ہے۔

وزیراعظم عمران خان نے کینیڈین ہم منصب جسٹن ٹروڈو سے ٹیلی فونک رابطہ کیا اور انہیں کچھ عرصے قبل ہونے والے انتخابات میں کامیابی اور حکومت کی تشکیل پر مبارک باد پیش کی۔ وزیراعظم عمران خان نے کہا کہ جسٹن ٹروڈو کی قیادت میں پاکستان اور کینیڈا کے تعلقات مزید وسیع ہوں گے۔

عمران خان نے کینیڈین وزیراعظم کو مقبوضہ کشمیر کی تازہ صورتحال، انسانی حقوق کی خلاف ورزیوں سے آگاہ کیا اور انہیں مقبوضہ کشمیر میں جاری لاک ڈاون فوری ختم کروانے کی ضرورت پر زور دیا۔وزیراعظم عمران خان نے خطے میں کشیدگی کم کرنے کے لیے مسئلہ کشمیر کے پرامن حل پر زور دیا۔

وزیراعظم عمران خان نے برطانوی وزیراعظم بورس جانسن کو ٹیلی فون کر کے انتخاب میں کامیابی پر مبارک باد دی۔