اقوام متحدہ مقبوضہ کشمیر اور بھارت میں مسلمانوں کیخلاف مظالم رکوائے، پاکستان

نیویارک: پاکستان نے اقوام متحدہ سے مطالبہ کیا ہے کہ وہ مقبوضہ کشمیر اور بھارت میں مسلمانوں کے خلاف جاری مظالم کا سلسلہ رکوانے کے لئے عملی اقدامات کرے۔

اقوام متحدہ میں پاکستان کے مستقبل مندوب منیراکرم نے مستقبل میں مظالم کی روک تھام کے حوالے سے سلامتی کونسل کے اجلاس میں شرکت کی، انہوں نے اس بات پرافسوس کا اظہار کیا کہ بھارت میں راشٹریہ سیوک سنگھ (آر ایس ایس) کے نظریے کی حامی بھارتی جنتا پارٹی(بی جے پی) کے دور حکومت میں اسلام مخالف پراپیگنڈے کو حکومتی پشت پناہی میں فروغ دیا جا رہا ہے۔

منیر اکرم کا مزید کہنا تھا کہ ہندو بالا دستی کے نظریئے کے حامی افراد کی اخلاقی اقدار کا اندازہ بی جے پی کے ممتاز رکن پارلیمنٹ کے اس اعلامیے سے لگایا جاسکتا ہے کہ تمام لوگ برابر نہیں اور درجے کے لحاظ سے مسلمان مساوی نہیں ہیں۔

مقبوضہ جموں وکشمیر کے حوالے سے منیر اکرم نے کہا کہ بی جے پی اور آر ایس ایس کے رہنماء کشمیریوں کی حق خود ارادیت کی جدوجہد اور تحریک آزادی کو کچلنے اور مقبوضہ وادی کو ہندو اکثریتی علاقے میں تبدیل کرنے کے ایجنڈے پر عمل پیراہیں کیونکہ ان کے نزدیک اس مسئلے کا حتمی حل یہی ہے۔