مقبوضہ کشمیر میں بھارتی ریاستی دہشتگردی، ایک اور بے گناہ کشمیری نوجوان شہید

سری نگر: بھارت کے غیرقانونی زیر قبضہ جموں و کشمیر میں غاصب بھارتی فوج کشمیریوں کے خون سے ہولی کھیلنے میں مصروف ہے، مقبوضہ وادی میں ایک اور کشمیری نوجوان کو شہید کردیا۔

کشمیر میڈیا سروس کے مطابق قابض بھارتی فوج نے ضلع بڈگام میں نام نہاد تلاشی و محاصرہ آپریشن آڑ میں چادر اور چار دیواری کے تقدس کو پامال کیا اور گھر گھر تلاشی کے دوران معصوم کشمیریوں کو ہراساں کیا جاتا رہا، جب کہ ریاستی دہشت گردی کا تازہ کارروائی میں ایک اور نوجوان کو فائرنگ کرکے شہید کردیا گیا

کشمیر میڈیا سروس کے مطابق اسی علاقے میں ایک حملے کے دوران بھارتی فوجی شدید زخمی ہوگیا تھا جب کہ واقعہ کے بعد قابض فوج نے پیرا ملٹری فورسز کے ساتھ سری نگر، پلواما اور شوپیاں کے علاقوں میں سرچ آپریشن شروع کردیا ہے۔

خیال رہے کہ بھارتی فوج کی ریاستی دہشت گردی مسلسل جاری ہے، گزشتہ ہفتے بھی قابض بھارتی فوج نے سرچ آپریشن کی آڑ میں 4 کشمیری نوجوانوں اور ایک خاتون فائرنگ کر کے شہید کردیا تھا جب کہ گزشتہ ماہ بھارتی افواج کی ریاستی دہشتگردی میں 20 کشمیری شہید ہوئے تھے۔