حریت کانفرنس کے زیراہتمام پروفیسرنذیر احمد شال کا تعزیتی ریفرنس

 اسلام آباد:کل جماعتی حریت کانفرنس کی آزاد جموں وکشمیر شاخ نے سفارتی محاذ پر متحرک کشمیری حریت رہنما پروفیسرنذیر احمد شال کے انتقال پر انہیں خراج عقید ت پیش کرنے کے لئے اسلام آباد میں اپنے دفتر میں کنوینر محمود احمد ساغر زیر صدارت ایک تعزیتی مجلس کا اہتمام کیا۔تقریب کے مہمان خصوصی سابق وزیراعظم آزاد جموں و کشمیر سردار عتیق احمد خان تھے۔

 تعزیتی مجلس میں نذیر احمد شال کو شاندار خراج عقیدت پیش کرتے ہوئے کہاگیا کہ وہ ایک بے باک کشمیری رہنما تھے جنہوں نے تنازعہ کشمیر اورمقبوضہ جموں وکشمیر میں بھارتی فوجیوں کی طرف سے جاری انسانی حقوق کی سنگین خلاف ورزیوں کو بین الاقوامی سطح پر موثر انداز میں اجاگرکیا۔ حریت رہنمائوں نے اس موقع پر کہاکہ تحریک آزادی کشمیر کے لئے ان کی خدمات کو ہمیشہ یاد رکھا جائے گا ۔

انہوں نے کہاکہ پروفیسر شال نے بین الاقوامی سطح پر کشمیریوں کے جذبات کی بھرپور ترجمانی کی اورکشمیریوں کی حالت زارسے دنیا کو آگاہ کیا۔ انہوں نے کہاکہ نذیر احمد شال نے اپنی پوری زندگی تحریک آزادی کشمیر کے لئے وقف کردی اور عالمی فورموں پرکشمیریوں کا موقف بھرپورانداز میں پیش کیا۔ انہوں نے کہاکہ نذیر احمد شال کو خراج عقیدت پیش کرنے کا بہترین طریقہ یہی ہے کہ ان مشن کو جو ہرحریت پسند کشمیری کا مشن ہے ،آگے بڑھایا جائے اورجدوجہد آزادی کو اس کے منطقی انجام تک جاری رکھا جائے۔

 مرحوم پروفیسر نذیر احمد شال ایک دانشور ،کہی کتابوں کے مصنف ،کشمیر کاز کے علمبردار اور ایک شریف النفس انسان تھے جنہوں نے اپنی پوری زندگی تنازعہ کشمیر کے حل اورجموں وکشمیر کی بھارتی تسلط سے آزادی کے لئے وقف کی۔ مرحوم کے لئے مغفرت کی دعا کی اور سوگوار خاندان سے اظہار تعزیت کیا دعائیں مجلس میں کسیر تعداد میں لوگوں نے شرکت کی۔