جنگی جنون میں مبتلابھارت علاقائی امن تباہ کرنا چاہتا ہے،فاروق حیدر

مظفرآباد: وزیر اعظم آزاد کشمیر نے کنٹرول لائن پربھارتی فوج کی فائرنگ سے مسلسل شہریوں کی ہلاکت پر شدید غم اور غصے کا اظہارکرتے ہوئے کہا ہے کہ مودی حکومت طے شدہ منصوبے کے تحت جنگی جنون کا ہوا دے کر خطے کے امن کو تباہ کرنے کے درپے ہے۔

مظفرآباد میں مرکزی ایوان صحافت کے نو منتخب عہدیداران  کی تقریب حلف برداری سے خطاب کرتے ہوئے راجہ فاروق حیدر خان کا کہنا تھا کہ بھارتی فائرنگ سے کنٹرول لائن پر شہریوں کی شہادت روز کا معمول بن چکا ہے ۔عالمی ادارے بھارت کے عزائم کو لگام دیں۔ پاک فوج بھارتی غرور اور جارحیت کی کمرتوڑنے کی بھرپور صلاحیت رکھتی ہے۔

راجہ فاروق حیدرکا کہناتھا کہ  کشمیر میں بھارتی مظالم کو دنیا کے سامنے لانے میں پاکستانی میڈیا اپنا کردار ادا کرے۔کشمیرمیں بھارتی مظالم کا پردہ چاک کرنا ملکی میڈیا کا قومی فریضہ ہے۔

وزیراعظم آزاد کشمیر کا کہنا تھا کہ آزاد کشمیر کے عبوری آئیں کی  تیرہویں ترمیم میں بہتری کی گنجائش موجود ہے، لیکن داخلی خودمختاری پرکوئی سمجھوتہ نہیں کریں گے۔ وزیراعظم آزادکشمیر کا مزیدکہنا تھا کہ وفاقی وزرا کی غیرذمہ دارانہ بیان بازی مقبوضہ کشمیر کے عوام کے دل دکھی اور ملکی اداروں کا وقار مجروع کر رہی ہے۔