سکھوں کوپاکستان سے متنفرکرنے کی مذموم سازش کامیاب نہیں ہوگی، شاہ محمود

اسلام آباد: وزیرخارجہ شاہ محمود قریشی واضح کیا ہے کہ سکھ برادری کو پاکستان سے متنفر کرنے کی بھارت کی مذموم سازش کامیاب نہیں ہوگی۔

ٹویٹر پر اپنے ایک پیغام میں شاہ محمود قریشی نے بھارتی ہم منصب سشما سوراج کی ہرزہ سرائی کا دو ٹوک الفاظ میں جواب دیتے ہوئے کہا کہ ‘پاکستان اور بھارت کے درمیان دو طرفہ مذاکرات سے میرے بیان کو سکھ برادری سے منسوب کرنے کی کوشش کامیاب نہیں ہوگی’۔

وزیرخارجہ شاہ محمود قریشی نے کہا کہ کرتار پور بارڈر کھلنے سے متعلق بھارتی وزیرخارجہ کے بیان پر ان کے ردعمل کو سازش کے تحت سیاق و سباق سے ہٹ کر پیش کیا جا رہا ہے تاکہ سکھ بھائیوں کے جذبات کو مجروح کر کے پاکستان سے متنفر کیا جا سکے۔

انہوں نے کہا کہ ‘میرا بیان پاکستان اور بھارت کے درمیان دو طرفہ مذاکرات کے تناظر میں تھا اور صرف پاک بھارت مذاکرات کے لیے ہی مخصوص تھا لیکن اس بیان کو سکھ برادری سے منسوب کرنے کی کوشش کی گئی’۔

شاہ محمود قریشی نے کہا کہ پاکستان سکھ برادری کی دل کی گہرائیوں سے قدر کرتا ہے اور سکھ برادری کے جذبات کا بے حد احترام کرتا ہے۔ پاکستان نے احترام کے اسی کے رشتے کے تحت سکھ برادری کی دیرینہ دلی خواہش کو پورا کرنے کے لیے کرتار پور راہداری کو کھولا، یہ تاریخی اقدام نیک نیتی سے اُٹھایا ہے اور نیک نیتی کے ساتھ یہ سفر آگے بھی جاری رہے گا۔ کوئی بھی پروپیگنڈا اس رشتے کو نہ تو توڑ سکے گا اور نہ ہی متنازعہ بنا سکے گا۔

واضح رہے کہ بھارتی وزیرخارجہ سشما سوراج نے اپنے پاکستانی ہم منصب کے گگلی والے بیان کو سکھ برادری سے نتھی کرنے کی کوشش کی تھی۔ شاہ محمود قریشی نے اپنے بیان میں کہا تھا کہ عمران خان نے کرتارپور کی گگلی پھینکی تو بھارت کو اپنے وزیر بھیجنے پڑے تھے۔