قومی سلامتی کمیٹی اجلاس،افغانستان کی صورتحال پر خصوصی سیل قائم کرنے کا فیصلہ

اسلام آباد: وزیر اعظم عمران خان کی زیر صدارت قومی سلامتی کمیٹی کا اہم اجلاس ہو اجس میں تینوں مسلح افواج کے سربراہان ، ڈی جی آئی ایس آئی ، خارجہ ، داخلہ ، دفاع اورخزانہ کے وفاقی وزراء اور مشیر قومی سلامتی امور نے شرکت کی۔ اجلاس میں ملک کی داخلی سکیورٹی ، بارڈر منیجمنٹ اور افغانستان کی تازہ ترین صورتحال پر تفصیلی غور کیاگیا۔ وزیراعظم کی افغانستان کے حوالے سے خصوصی سیل قائم کرنے کی ہدایت  کردی۔

اجلاس کے اعلامیے کے مطابق وزیر اعظم کو علاقائی سلامتی کی صورتحال ، افغانستان کی حالیہ پیش رفت اور اس کے پاکستان پر ممکنہ اثرات پر تفصیلی بریفنگ دی گئی۔ کمیٹی شرکا نے کہا کہ خطے میں ابھرتی ہوئی صورتحال انتہائی پیچیدہ ہے،افغانستان میں کسی بھی عدم استحکام کے پاکستان کے لیے شدید مضمرات ہو سکتے ہیں۔

وزیراعظم نے افغانستان کی صورتحال سے متعلق مربوط کوششوں کی ضرورت پر زور دیتے ہوئے کہاکہ خصوصی سیل افغانستان کے لیے انسانی امداد کے بین الاقوامی روابط میں کردار ادا کرے گا اور موثر بارڈر مینجمنٹ اور کسی بھی منفی پھیلائو کو روکنے کے لیے کام کرے گا۔ پوری دنیا نے افغانستان میں پاکستان کی مثبت شراکت داری  کو تسلیم کیا۔قومی سلامتی کمیٹی نے افغانستان میں ممکنہ انسانی بحران پر تشویش کا اظہار کرتے ہوئے مطالبہ کیا کہ بین الاقوامی برادری افغانستان کو انسانی بحران سے بچانے کے لیے مدد فراہم کرے۔