دنیا بھر میں ایک ہی دن میں 1 لاکھ 81 ہزار نئے کورونا مریض سامنے آگئے

عالمی ادارہ صحت نے بھی خبردار کرتے ہوئے کہاہے کہ دنیا اب ایک نئے اور خطرناک مرحلے میں داخل ہوچکی ہے۔

برازیل میں ایک ہی دن میں کورونا وائرس کے مزید 55 ہزار مریض سامنے آ گئے ہیں جس کے بعد متاثرہ افراد کی  تعداد 10 لاکھ سے تجاوز کر گئی ہے جب کہ برازیل میں 49 ہزار افراد جان سے جا چکے ہیں۔

 امریکا میں کورونا وائرس کے مزید 33 ہزار مریضوں کے ساتھ متاثرہ مریضوں کی تعداد 22 لاکھ  96 ہزار ہو گئی ہے۔ بھارت میں مزید 14 ہزار 700 سے زائد مریض سامنے آ گئے ہیں جب کہ  سعودی عرب میں بھی مریضوں کی تعداد ڈیڑھ لاکھ سے تجاوز کر گئی ہے۔

ایران میں کورونا وائرس کا مرض ایک بار پھر پھیل رہا ہے، جمعے کو ایران میں مزید 2 ہزار 615 مریض سامنے آ گئے جب کہ مزید 120 افراد انتقال کر گئے، اس طرح ایران میں کورونا مریضوں کی تعداد 2 لاکھ سے تجاوز کر گئی ہے۔

کورونا وائرس سے متاثر چلی 2 لاکھ 31 ہزار مریضوں کے ساتھ نویں نمبر  پر ہے جب کہ  میکسیکو میں مزید 5 ہزار 23 نئے مریض سامنے آئے اور 647 مریض جان سے چلے گئے جس کے بعد میکسیکو میں کورونا کے باعث جان سے جانے والے افراد کی تعداد 20 ہزار 394 ہو گئی ہے۔

امریکا میں 2 کروڑ 73 لاکھ اور روس میں ایک کروڑ 63 لاکھ سے زائد کورونا ٹیسٹ ہو چکے ہیں، جب کہ برطانیہ 74 لاکھ اور بھارت 64 لاکھ سے زیادہ افراد کے ٹیسٹ کر چکا ہے۔