مودی سرکار کی تنگ نظری،کرتارپور راہداری کھولنے کی پاکستانی پیشکش مسترد

اسلام آباد: مودی سرکار نے ایک بار پھر تنگ نظری اور اقلیتوں کے ساتھ امتیازی سلوک کا مظاہرہ کرتے ہوئے راجا رنجیت سنگھ کی برسی کے موقع پر کرتارپور راہداری کھولنے کی پاکستانی پیشکش مسترد کردی۔

پاکستان کی جانب سے سکھوں کے مقدس مقام گوردوارہ کرتارپور صاحب کو دوبارہ کھولنے کی مخلصانہ پیشکش کی گئی۔تاہم بھارتی میڈیا کے مطابق کرتار پور راہداری کھولنے کی پاکستانی پیشکش مسترد کر دی گئی۔پاکستان نے 29 جون سے راہداری کھولنے کیلئے تیاری مکمل کر رکھی تھی۔

واضح رہے کہ گذشتہ روز پاکستانی وزیرخارجہ شاہ محمود قریشی نے سماجی رابطوں کی ویب سائٹ ٹویٹر پر اپنے بیان میں کہا تھا کہ دنیا بھر میں جیسےعبادت گاہیں کھل رہی ہیں، پاکستان کرتارپور راہدری کھولنےکی تیاری کر رہا ہے، بھارت کو 29 جون کو کرتار پور راہداری کھولنے سے متعلق اپنی آمادگی سے آگاہ کر رہے ہیں۔

جس کے بعد پاکستانی وزارت خارجہ کی ترجمان عائشہ فاروقی کی جانب سے جاری بیان میں بتایا گیا تھا کہ پاکستان نے راجہ رنجیت سنگھ کی برسی کے موقع پر 29جون کو راہداری کھولنے کیلئے اپنی تیاری سے متعلق بھارت کو آگاہ کردیا ہے، بیان میں امید کا اظہار کیا گیا تھا کہ بھارت بھی اپنی طرف انسداد کورونا کے لئے ایس او پیز پر عملدرآمد یقینی بناتے ہوئے پاکستانی پیشکش کا مثبت جواب دے گا۔

واضح رہے اس سے قبل کرتارپور کوریڈور کو 16 مارچ کو کورونا کے بڑھتے ہوئے کیسز کے سبب عارضی طور پر بند کیا گیا تھا۔ پاکستان نے بھارت کو کرتارپور کوریڈور دوبارہ کھولنے ایس او پیز پر تبادلہ خیال کی دعوت بھی دی تھی۔