وزیراعظم نے کراچی میں بجلی بحران پر قابو پانے کیلئے خصوصی کمیٹی تشکیل دے دی

اسلام آباد: وزیراعظم عمران خان نے روشنیوں کے شہر کو اندھیروں سے نکالنے اور بجلی بحران پر قابو پانے کے لیے کمیٹی تشکیل دے دی، جسے کے الیکٹرک انتظامیہ سے ملاقات کرکے مسائل کے حل کا ٹاسک بھی سونپ دیا۔

وزیراعظم عمران خان سے گورنرسندھ عمران اسماعیل نے اسلام آباد میں ملاقات کی، جس میں سندھ کی مجموعی سیاسی صورت حال، کورونا وباء کی روک تھام کے لئے اٹھائے گئے اقدامات اور حکمت عملی پر تبادلہ خیال کیا گیا۔

کراچی کے اہم ترین مسئلے بجلی کے بحران پر بھی تفصیلی بات چیت کی گئی، وزیراعظم نے کراچی میں بجلی بحران پر قابو پانے اور کے الیکٹرک سے متعلقہ مسائل کے حل کے لیے کمیٹی تشکیل دے دی، کمیٹی میں وفاقی وزیر برائے منصوبہ بندی اسد عمر، معاون خصوصی برائے توانائی شہزاد قاسم اور گورنر سندھ عمران اسماعیل شامل ہیں۔

وزیراعظم نے کمیٹی کو ہدایت کی کہ وہ کے الیکٹرک انتظامیہ سے جلد ملاقات کرکے مسائل کا حل ممکن بنائیں، اور وزارت توانائی کی جانب سے ہرممکن تعاون کیا جائے۔