سابقہ حکومتوں کے غلط فیصلوں سے پاکستان کی معیشت کمزور ہوتی رہی، وزیراعظم

چلاس: وزیراعظم عمران خان کا کہنا ہے کہ پاکستان میں بجلی پیدا کرنے کی بھرپور صلاحیت موجود ہیں تاہم ماضی میں غلط فیصلوں سے ملک کی صنعتی ترقی کو نقصان پہنچا۔

وزیراعظم عمران خان نے گلگت بلتستان میں دیامر بھاشا ڈیم کے کام کا جائزہ لیا۔ وزیراعظم کو ڈیم پر کام کی پیشرفت سے متعلق بریفنگ دی گئی اس موقع پر وفاقی وزراء فیصل واوڈا، علی امین گنڈا پور، آرمی چیف جنرل قمر جاوید باجوہ اور ڈی جی آئی ایس آئی لیفٹننٹ جنرل فیض حمید بھی موجود تھے۔

بعد ازاں وزیراعظم عمران خان نے چلاس میں عوامی اجتماع سے خطاب کرتے ہوئے کہا کہ دیامر بھاشا ڈیم تیسرا بڑا ڈیم  ہے، پاکستان میں بجلی پیدا کرنے کی بھرپور صلاحیت موجود ہیں لیکن غلط فیصلوں سے ملک کی صنعتی ترقی کو نقصان پہنچا۔

اپنی بات جاری رکھتے ہوئے وزیراعظم عمران خان کا کہنا تھا تھا کہ دریاؤں سے بجلی بنانے کے بجائے تیل پر بجلی بنانے کو ترجیح دی گئی، مہنگی بجلی کی وجہ سے صنعتوں پر اثر پڑا جب کہ ہمیں خدشہ ہے مستقبل میں سیلاب جیسی صورتحال کا سامنا نہ ہو۔

انہوں نے کہا کہ پاکستان کی بد قسمتی رہی کہ قلیل المدتی فیصلے ہوئے، ماضی میں غلط فیصلے کیے جس کے باعث معیشت کمزور ہوتی رہی، روپے کی قدر میں کمی کی وجہ سے  ملکی کرنسی پر دباؤ آیا، 20ارب روپے کا خسارہ ہمیں ورثے میں ملا، جب رقوم  باہر جاتی ہیں تو کرنٹ اکاوَنٹ خسارہ بڑھتا ہے۔

عمران خان نے کہا کہ انسانوں پر سرمایہ کاری، انصاف اور قانون پر عمل درآمد سےترقی  ہوتی ہے، وہ قومیں ترقی کرتی ہیں جومشکل فیصلے کرتی ہیں، چین کی کامیابی طویل المدتی منصوبے بنانا ہے، چین نے 30،30 سالہ منصوبہ بندی کررکھی ہے۔

وزیراعظم نے مزید کہا کہ عالمی وباء کورونا کی وجہ سے پاکستان میں بے روزگاری میں اضافہ ہوا، بیرون ممالک سے اشیاء درآمد کرنے کے باعث مہنگائی میں اضافہ ہوتا ہے۔