2026ء کا فٹبال ورلڈ کپ کیریئر کا آخری عالمی ایونٹ ہوگا:کرسٹیانو رونالڈو

پرتگال کے عالمی شہرت یافتہ فٹبال اسٹار کرسٹیانو رونالڈو نے تصدیق کی ہے کہ 2026ء کا فٹبال ورلڈ کپ ان کے شاندار کیریئر کا آخری عالمی ایونٹ ہوگا۔ 39 سالہ فٹبالر نے کہا کہ وہ ایک یا دو سال کے اندر فٹبال سے مکمل ریٹائرمنٹ لینے کا ارادہ رکھتے ہیں۔

آخری عالمی ٹورنامنٹ کا اعلان

ریاض میں منعقدہ عالمی سیاحت و سرمایہ کاری کانفرنس سے ویڈیو کال کے ذریعے خطاب کرتے ہوئے رونالڈو نے کہا کہ “میرے لیے ‘جلد’ کا مطلب دس سال نہیں بلکہ ایک یا دو سال ہے۔ میں اس وقت بہترین فٹنس میں ہوں، گول کر رہا ہوں اور خود کو تیز اور توانا محسوس کر رہا ہوں، لیکن حقیقت یہ ہے کہ میرا کیریئر اپنے اختتامی مرحلے میں داخل ہو چکا ہے۔”

 ورلڈ کپ پر نظریں

رونالڈو نے واضح کیا کہ 2026ء میں امریکہ، کینیڈا اور میکسیکو میں ہونے والا فیفا ورلڈ کپ ان کے کیریئر کا آخری بڑا ایونٹ ہوگا۔ انہوں نے کہا کہ “یقیناً، یہ میرا آخری ورلڈ کپ ہوگا، کیونکہ اس وقت میری عمر 41 سال ہوگی۔ میں نے فٹبال کے لیے اپنی زندگی کے 25 سال وقف کیے ہیں، بے شمار اعزازات جیتے، ریکارڈ قائم کیے، اور میں اس سب پر فخر محسوس کرتا ہوں۔ اب وقت ہے کہ لمحے کو جیا جائے اور اس سے لطف اندوز ہوا جائے۔”

اپنے بیٹے کے حوالے سے گفتگو

رونالڈو نے گفتگو کے دوران اپنے بیٹے، کرسٹیانو جونیئر، کا بھی ذکر کیا جو پرتگال کی انڈر-16 ٹیم کی نمائندگی کر رہا ہے۔ انہوں نے کہا کہ “اگر میرا بیٹا مجھ سے بہتر کھلاڑی بن جائے تو یہ میرے لیے فخر کی بات ہوگی۔ انسان فطری طور پر نہیں چاہتا کہ کوئی اس سے بہتر ہو، مگر میں چاہتا ہوں کہ میرے بچے مجھ سے آگے بڑھیں۔”

رونالڈو کا  جذبہ

انہوں نے مزید کہا کہ “میں اپنے بیٹے پر کوئی دباؤ نہیں ڈالنا چاہتا۔ میری خواہش ہے کہ وہ خوش رہے — چاہے فٹبال کھیلے یا کوئی اور راستہ اپنائے۔ نئی نسل کا سوچنے اور جینے کا انداز مختلف ہے، اور بطور والد میرا کام ہے کہ میں رہنمائی کروں تاکہ وہ اپنی صلاحیتوں کے مطابق اپنی راہ بنا سکے۔”

فٹبال میں رونالڈو کا ورثہ

کرسٹیانو رونالڈو کو تاریخ کے عظیم ترین فٹبالرز میں شمار کیا جاتا ہے۔ وہ پانچ بار کے بیلن ڈی آر جیت چکے ہیں، یورپ اور عالمی سطح پر متعدد اعزازات حاصل کر چکے ہیں اور 850 سے زائد گول کرنے والے دنیا کے پہلے کھلاڑی ہیں۔